/2023.03.24/ Засгийн газраас хэрэгжүүлж буй "Хөдөөгийн сэргэлт бодлого"-ын хүрээнд хөдөө, орон нутагт шилжин суурьших болон тухайн орон нутагт амьдарч буй анх удаа орон сууц худалдаж авах иргэдэд тодорхой хөнгөлөлт үзүүлэхээр болсон билээ.

Тодруулбал, ипотекийн зээлийн хүүгийн 6 хувийг хөнгөлж 3 хувь болгон, урьдчилгаа төлбөрийн 30 хувийн 60 хувийг төр батлан даахаар шийдвэр гарсан.

Тэгвэл УИХ-аар Зээлийн батлан даалтын сангийн тухай хуульд нэмэлт өөрчлөлт оруулж, ипотекийн зээлийн урьдчилгаа төлбөрийн 30 хувийн 60 хүртэлх хувьд батлан даалт гаргах эрх зүйн орчин бүрдсэн аж. Хүүгийн зөрүү болох 8 тэрбум төгрөгийг энэ жилийн төсөвт тусгасан байна. Ингэснээр иргэдэд олгох ипотекийн 3 хувийн хүүтэй зээлийг олгож эхлэхээр болжээ.

Энэхүү зээлийг олгож эхэлснээр жилд 2700 хүртэлх өрх хамрагдах нөхцөл бүрдэх юм. Тус шийдвэрийн хүрээнд энэ сарын 23-наас эхлэн ХААН, Ариг, Транс, Богд, Капитрон, Төрийн болон Худалдаа хөгжлийн банканд хандаж зээлд хамрагдах хүсэлтээ гаргах боломжтой.

Зээлийн журамтай ЭНД дарж танилцана уу.