/2022.12.12/: Перу улсад шинэ сонгууль явуулах, баривчлагдсан Ерөнхийлөгч асан Педро Кастилог суллахыг шаардсан жагсагчидтай цагдаа нар мөргөлдсөний улмаас хоёр хүн амиа алджээ.
Сургуулийн багш, үйлдвэрчний эвлэлийн удирдагч асан Кастилог Конгрессыг тараахыг оролдсоноос болж өнгөрсөн лхагва гарагт хууль тогтоогчид түүнийг албан тушаалаас нь огцруулжээ. Үүний дараахан түүнийг баривчилсан бөгөөд бослого гаргасан, хуйвалдаан зохион байгуулсан хэрэгт буруутгаж байгаа юм.
Дэд ерөнхийлөгчөөр ажиллаж байсан Дина Болуартег ерөнхийлөгчийг орлохоор сонгосон бөгөөд түүнийг тангараг өргөсний дараахан иргэд шинэ сонгууль явуулахыг шаардаж эхэлжээ.
Эсэргүүцлийн жагсаал өчигдрөөс эхэлсэн бөгөөд Перугийн Кажамарка, Арекипа, Хуанкайо, Куско, Пуно зэрэг хотуудад үргэлжилж байна.
Апуримак мужийн Андахуайлас хотод жагсагчид хотын нисэх онгоцны буудал руу дайрахыг оролдсон бөгөөд жагсагчид цагдаа нартай мөргөлджээ.
Мөргөлдөөний үеэр 15, 18 настай 2 залуу "буудуулж амиа алдсан тухай Перугийн Омбудсманы Тамгын газрын дарга Элиана Револлар мэдээллээ.
Эх сурвалж: ВВС
