Гар утасны аппликэйшнээр дамжуулан тоон гарын үсгийг олгож эхэллээ
 
Энэ мэдээ хуучирсан буюу 2022/08/12-нд нийтлэгдсэн мэдээ болно.

Гар утасны аппликэйшнээр дамжуулан тоон гарын үсгийг олгож эхэллээ

/2022.08.12/: Засгийн газрын хэрэгжүүлэгч агентлаг ХЗДХЯ-ны харьяа Улсын бүртгэлийн ерөнхий газраас Монгол Улсын 16 ба түүнээс дээш насны иргэддээ 2022 оны тавдугаар сарын 02-ны өдрөөс эхлэн тоон гарын үсгийг иргэний үнэмлэхийн санах ой буюу чипэнд суулган олгож эхэлсэн.

Өнөөдрийн байдлаар 265,365 иргэнд иргэний үнэмлэхийн санах ой буюу чипэнд суулгаж тоон гарын үсгийг олгоод байна. Улсын бүртгэлийн ерөнхий газраас өнөөдөр тоон гарын үсгийг гар утасны аппликейшнээр дамжуулан иргэдэд олгож эхэлсэн талаарх дэлгэрэнгүй мэдээлэл болон танилцуулгыг хүргэлээ.

Улсын бүртгэлийн байгууллагын 21 аймаг, 9 дүүрэг дэх Улсын бүртгэлийн хэлтсээр, мөн нийслэлийн үйлчилгээний нэгдсэн төвүүдээр тоон гарын үсгийг ухаалаг гар утасны аппликэйшнээр дамжуулан иргэдэд олгож эхэлсэн ба одоогоор 1,600 гаруй иргэнд гар утасны аппликэйшнээр дамжуулан тоон гарын үсгийг олгожээ.

Гар утасны аппликэйшнээр дамжуулан тоон гарын үсгийг олгосноор ухаалаг зөөврийн төхөөрөмжүүд дээр ашиглах, хэрэглээний өргөн боломжийг бий болгохоос гадна аж ахуй нэгж, байгууллагууд өөрсдийн интернет цахим банкны аппуудтай холбож өгөх боломжтой бөгөөд ямар ч төрлийн аппликэйшнтэй хоршиж ажиллах бүрэн боломжтой.

Мөн иргэн өөрийн хэрэгцээнд нийцүүлэн нэгээс олон тоон гарын үсгийн гэрчилгээтэй байж болох бөгөөд энэхүү аппликэйшнийг ашиглан тохирох гэрчилгээг сонгон ашиглах боломжтой юм. Мөн иргэн өөрийн гэрчилгээг баталгаажуулах PIN кодыг солих, баталгаажуулалтын үед хурууний хээ болон FaceID-г ашиглах эсэхээ өөрөө тохируулах зэрэг олон давуу талыг бий болгож байна.

УБЕГ-ын дарга Д.Дэлгэрсайхан: “Өнөөдрийн байдлаар улсын бүртгэлийн байгууллага өөрсдөө иргэдэд лавлагаа олгох болон тодорхой үйлчилгээнүүд дээр тоон гарын үсгийг хэрэглэж, хэрэглээнд нэвтрүүлж эхлээд байна. Тоон гарын үсгийг гар утасны аппликэйшнээр дамжуулан авснаар тодорхой нэмэлт төхөөрөмжийн шаардлагагүй болох юм. Тодруулбал, гар утаснаасаа и-монголиад болон бусад цахим сайтуудад нэгдэж шууд үйлчилгээгээ авах боломжтой.

Тоон гарын үсэг гэдэг бол тодорхой алгоритм, тодорхой технологиор шифрлэгдсэн, тухайн иргэнийг таних түлхүүр юм. Энэ түлхүүрийг иргэний үнэмлэхийн чип болон гар утсанд суурилуулах энэ бололцоог бид бүрэн хангаад байна. Иргэд харьяалал харгалзахгүйгээр улсын бүртгэлийн байгууллагын бүх нэгжээс тоон гарын үсгээ авч болох бөгөөд бүртгэгчээр дамжуулан иргэний үнэмлэхийн чипэнд суулгах, мөн бүртгэгчийн оролцоогүйгээр цахим машин буюу киоскоор авах, дээрээс нь нэмээд гар утсаараа авч болдог боллоо.

Тоон гарын үсэг бол хурууны хээгээр үйлчилгээ авдаг байсантай ижил, эн тэнцэхүйц үйлчилгээ учраас иргэд эхний удаад зайлшгүй өөрийн биеэрээ ирж, өөрийгөө таниулсны дараа тоон гарын үсгээ авах ёстой. Нөгөө талаар цахим үйлчилгээний цаана байгаа аюулгүй байдлыг хангах шаардлага зайлшгүй гарч байгаа юм.” гэлээ.

Тоон гарын үсэг хэрэглээнд бүрэн нэвтэрснээр хувь хүмүүс болон албан байгууллагууд орон зай, цаг хугацааг үл хамааран албан харилцаагаа явуулах боломжууд бүрдэж байна. Түүнчлэн, Улсын бүртгэлийн байгууллага нь тоон гарын үсгийг олгосноор иргэн, аж ахуйн нэгж байгууллагууд төрийн болон бусад бүх төрлийн цахим үйлчилгээг авах, банк санхүү, төлбөр тооцоо хийх, гэрээ хэлцэл байгуулах, даатгал, эрүүл мэндийн үйлчилгээг авах боломж бүрдэх юм.

Эх сурвалж: УБЕГ

Усан паркыг орон сууц болгох ШИДЭТ зөвшөөрлийг БХБЯ-наас олгосон байжээ
Усан паркыг орон сууц болгох ШИДЭТ зөвшөөрлийг БХБЯ-наас олгосон байжээ
 
Зарим комисс, хороо, үндэсний зөвлөлийн бүрэлдэхүүнийг шинээр баталж, заримыг нь татан буулгалаа
Зарим комисс, хороо, үндэсний зөвлөлийн бүрэлдэхүүнийг шинээр баталж, заримыг нь татан буулгалаа
Энэ мэдээ хуучирсан буюу 2022/08/12-нд нийтлэгдсэн мэдээ болно.