/2022.04.15/: Өчигдөр орсон их цасны улмаас Өвөрхангай аймгийн Арвайхээр-Баянхонгор чиглэлийн авто зам хаагдаад байгаа билээ.
Тэгвэл тус аймгийн Цагдаагийн газраас өөрийн цахим хуудсаараа дамжуулан дараах мэдээллийг хийжээ.
Арвайхээр-Баянхонгор чиглэлийн авто зам дагуу их хэмжээний цас орж, тээвэрлэлтийн үйл ажиллагаанд саад учирч байгаа тул иргэдийн амь, нас, эрүүл мэнд, эд хөрөнгийг болзошгүй гамшгаас урьдчилан сэргийлэх зорилгоор аймгийн Засаг даргын энэ оны дөрөвдүгээр сарын 14-ний А/189 дүгээр захирамжаар дээрх чиглэлийн авто зам, замын хөдөлгөөнийг түр зогсоож, Нарийнтээл, Хайрхандулаан сумдын авто зам, давааны цас цэвэрлэгээний ажил хийгдэж байна.
Иймд иргэд, жолооч, тээвэрчид тухайн замыг нээх хүртэл цаг агаарын нөхцөл байдлыг үнэлж, тус чиглэлд зорчихгүй байхыг анхааруулж байна.
Дээрх чиглэлийн авто замыг нээхээр эргэн мэдээлэх болно гэжээ.
Эх сурвалж: Өвөрхангай аймгийн ЗДТГ
