/2023.10.05/: Өмнөговь аймаг, Цогтцэций сумын Цагаан-Овоо багийн 8 дахь километр гэдэг газар зам тээврийн ноцтой осол гарчээ.

Тодруулбал, тус газарт зогсож байсан ачааны автомашины хойд талаас суудлын автомашин мөргөж, суудлын автомашины төмөр хийцэд 1 хүн хавчуулагдсан хэрэг өчигдөр гарсан байна.

Тус аймгийн Онцгой байдлын газрын Цогтцэций сум дахь Онцгой байдлын алба хаагчид ослын газарт очиход “Цагаан хад” гэдэг газраас “Эрдэнэс таван толгой” ХХК-ийн чиглэлд зорчиж явсан “Норд бенз” загварын ачааны автомашины хойд талаас “Приус-20” загварын суудлын автомашин мөргөсөн байж.

Суудлын автомашины бүхээг дотор Хөвсгөл аймгийн харьяат, иргэн Н 29 настай, эмэгтэй хавчуулагдсан байсныг эсэн мэнд гаргаж, Цогтцэций сум дахь Сум дундын эмнэлэгт хүргэжээ. Харин суудлын автомашины жолооч нийслэлийн Сонгинохайрхан дүүргийн харьяат Г 34 настай, эрэгтэй, зорчигч Өмнөговь аймгийн харьяат иргэн С 37 настай, эмэгтэй, Б 35 настай, эмэгтэй нар ослын улмаас амиа алдсан байсан тул цогцсыг гаргаж, Цагдаагийн байгууллагад тус тус шилжүүлэн өгсөн байна.

Эх сурвалж: ОБЕГ