/2022.05.25/ Засгийн газрын хуралдаанаас гаргасан шийдвэрийг Зам, тээвэр хөгжлийн сайд Л.Халтар танилцууллаа.

Үүний дараа тэрээр сэтгүүлчдын асуултад хариуллаа.

-Контейнер тээврээс үүдэлтэйгээр БНХАУ-ын Эрээний хил гаалийн удирдлагуудыг саатуулж, шалгаж байгаа гэсэн мэдээлэл байна. Үүнтэй холбоотойгоор таныг мөн шалгуулах ёстой гэж зарим хүмүүс үзэж байна. Үүнд тайлбайр өгөөч?
-Тиймэрхүү зүйл явж байгааг би харсан. БНХАУ-ын Эрээний хил гаалийн удирдлагуудыг шалгаж байна гэдэг мэдээллийг би та бүхэнтэй адилхан олон нийтийн сүлжээнээс мэдсэн. Албан ёсоор ийм мэдээлэл ирээгүй байна. Энэ асуудлыг ГХЯ-наас тодруулах хэрэгтэй. Намайг яагаад тэдэнтэй холбоод байгааг хэлж мэдэхгүй байна.

Гэхдээ надад идэж, уусан зүйл байхгүй учир хэзээ ч, хаана ч очоод шалгуулахад нүүр бардам байна.

-Таны хамаарал бүхий хүн тээвэр зуучын компанитай гэсэн мэдээлэл байна?

-Тэгж яриад байдаг юм. Тэрийгээ батлаад гаргаад ир. Миний хөрөнгө оруулгын мэдүүлэгт ийм зүйл байхгүй.

-БНХАУ-ын Эрээний хил гаалийн удирдлагуудыг шалгаж байгаа нь манайхтай огт хамааралгүй гэсэн үг биш. Хятадын талаас маш том авилгын сүлжээ байсныг илрүүллээ. Үүнд манай талаас ч мөн оролцсон байх магадлалтай гэсэн хардлага олон нийтийн дунд явж байна. Тимээс холбогдох хууль хяналтын байгууллага, яам ямар байр суурьтай байгаа вэ?

-Ийм хардлага байгааг хэн ч эсэргүүцэж, үгүйсгээгүй. Гэхдээ шалгадаг хүн нь би биш. Энэ асуудлыг цагдаа, тагнуулын байгууллага шалгах нь зүйтэй байх.