Дэлхийн хиймэл оюун ухааны салбарын хамгийн нөлөө бүхий компаниудын нэг болох NVIDIA-ийн үүсгэн байгуулагч, гүйцэтгэх захирал Женсен Хуанг Хятадын тагнуулын байгууллагын бай болсон байж болзошгүй гэх дуулиан олон улсын анхаарлын төвд орлоо.

Үүнтэй холбоотой мэдээллүүд гарсны дараа NVIDIA-ийн Төлөөлөн удирдах зөвлөл 2026 оны арваннэгдүгээр сарын 8-нд хараат бус дотоод шалгалт эхлүүлэхээ албан ёсоор мэдэгдсэн байна.

АНУ-ын тагнуулын байгууллагуудын анхааралд орсон гэх эмэгтэй нь Сингапурт төвтэй, NVIDIA-ийн чип худалдан авагч Megaspeed компанийн удирдах түвшний ажилтан асан Алис Хуанг юм.

"The New York Times", "Financial Times" зэрэг хэвлэлүүдийн мэдээлснээр Алис Хуанг Хятадын тагнуулын байгууллагатай холбоотой байж болзошгүй бөгөөд Женсен Хуангтай ойр дотно харилцаа тогтоон, түүнээс мэдээлэл авах, улмаар АНУ-ын технологийн экспортын бодлогод нөлөөлөх зорилготой байсан гэх мэдээлэл гарчээ.

Тагнуулын ажиллагааны гол зорилго юу байсан бэ?

Мэдээллүүдэд дурдсанаар уг ажиллагааны боломжит зорилго нь NVIDIA-ийн өндөр хүчин чадалтай хиймэл оюун ухааны чипүүдийн талаар мэдээлэл олж авах, мөн АНУ-ын Хятад руу чиглэсэн технологийн экспортын хязгаарлалтыг зөөлрүүлэхэд Женсен Хуанын нөлөөг ашиглах явдал байсан байж болзошгүй аж.

Энд нэг чухал нөхцөл бий. АНУ-ын экспортын хяналтын улмаас NVIDIA-ийн хамгийн дэвшилтэт чипүүдийг Хятадад нийлүүлэхэд хязгаарлалт үйлчилдэг. Харин Megaspeed компани нь NVIDIA-ийн чипүүдийг худалдан авдаг бөгөөд тус компани чипийг Хятад руу хууль бусаар нэвтрүүлэхэд оролцсон байж болзошгүй гэх асуудлаар мөн шалгалтад өртөж байжээ.

Женсен Хуанг хувийн харилцаагаа хүлээн зөвшөөрөв

Энэ дуулианы хамгийн анхаарал татсан хэсэг нь Женсен Хуанг ажилтнууддаа илгээсэн захидалдаа эхнэртээ үнэнч бус хандсанаа хүлээн зөвшөөрч, гэр бүл болон компанийн хамт олноосоо уучлал хүссэн явдал байв.

Тэрбээр өөрийн үйлдэл эхнэр, хүүхдүүдэд нь хүндээр туссаныг хүлээн зөвшөөрч, компанийн ажилтнууд, ТУЗ, хувьцаа эзэмшигчдийн итгэлийг дахин олж авахын төлөө ажиллана гэж мэдэгджээ.

Гэхдээ түүний хувийн харилцаа болон тагнуулын ажиллагааны талаарх мэдээлэл нь тусдаа асуудал бөгөөд Алис Хуангтай холбоотой тагнуулын хэргийг шүүхээр эцэслэн тогтоогоогүй байна.

АНУ-ын Конгресс ч асуудалд анхаарал хандуулав

АНУ-ын Төлөөлөгчдийн танхимын Гадаад харилцааны хороо, Хятадын Коммунист намын асуудал хариуцсан тусгай хороо болон Тагнуулын асуудал хариуцсан хорооны дарга нар Женсен Хуанад хандан Конгресст хаалттай мэдээлэл өгөхийг хүссэн байна.

Тэд NVIDIA-ийн нууц мэдээлэл болон АНУ-ын үндэсний аюулгүй байдалд эрсдэл учирсан эсэхийг тодруулахыг зорьж байгаа аж.

NVIDIA-ийн албан ёсны байр суурь

NVIDIA-ийн Төлөөлөн удирдах зөвлөл хараат бус захирлууд болон гаднын хууль зүйн зөвлөхүүдийн оролцоотойгоор шалгалт явуулахаа мэдэгдсэн.

Компанийн зүгээс одоогоор АНУ-ын үндэсний аюулгүй байдал болон NVIDIA-ийн компанийн нууц мэдээлэл алдагдсан гэж үзэх үндэслэл байхгүй гэдгийг онцолжээ.

Мөн Женсен Хуанг шалгалтыг бүрэн дэмжиж, хамтран ажиллахаа илэрхийлсэн байна. Тэрбээр гүйцэтгэх захирлын албан тушаалаа үргэлжлүүлэн хаших байр суурьтай байгаа аж.

Энэ хэрэг яагаад дэлхий нийтийн анхаарлыг татаж байна вэ?

NVIDIA бол хиймэл оюун ухааны хувьсгалын гол хөдөлгөгч хүч болсон технологийн компани. Тус компанийн чипүүд дэлхийн хамгийн том технологийн компаниудын дата төв, хиймэл оюун ухааны системүүдэд ашиглагддаг.

Тиймээс компанийн удирдлагад чиглэсэн байж болзошгүй тагнуулын ажиллагаа нь зөвхөн нэг хүний хувийн асуудал бус, АНУ, БНХАУ-ын технологийн өрсөлдөөн, үндэсний аюулгүй байдал, дэлхийн AI зах зээлд нөлөөлөхүйц асуудал болоод байна.

Эх сурвалж: Reuters