/2022.01.27/: Орос Улс Украины зүүн хэсэгт өрнөж буй мөргөлдөөний асуудлаар Парист дөрвөн талт хэлэлцээ хийхээр албан тушаалтнууд бэлдэж байгаа ч лхагва гарагт цэргийн сургуулилт хийж, Беларусь руу нэмэлт хүч, сөнөөгч онгоц илгээгээд байна.
Украины асуудлаар Кремлийн төлөөлөг ч Франц, Герман, Украины албаны хүмүүстэй уулзаж, Парист "Нормандын формат"-ын хэлэлцээ хийх ёстой бөгөөд энэ нь Украины ойролцоо Орос Улс цэргийн хүчээ нэмэгдүүлж байгаа нь дайран түрэмгийлэл хийх вий гэсэн болгоомжлолыг төрүүлээд байгаа юм.
Орос Улс довтлохоор төлөвлөөгүй гэж мэдэгдэж байгаа ч Барууны орнууд хэрвээ ийм зүйл болвол ОХУ-ын эсрэг эдийн засгийн хатуу шийтгэл ногдуулна гэж сүрдүүлсэн. АНУ-ын Ерөнхийлөгч Жо Байден мягмар гарагт ОХУ-ын Ерөнхийлөгч Владимир Путинд хувийн хориг арга хэмжээг авах болно гэж мэдэгдсэн бол Их Британи мөн адил хориг тавихыг үгүйсгэхгүй гэж лхагва гарагт мэдэгджээ.
Нормандын хэлэлцээр нь Украины зүүн хэсэгт өрнөж буй Киев болон ОХУ-ын дэмжлэгтэй салан тусгаарлагчдын хооронд олон жилийн турш үргэлжилсэн ч бодит ахиц дэвшил гараагүй мөргөлдөөнийг зогсоох асуудлыг лхагва гарагт авч хэлэлцсэн бөгөөд тус хэлэлцээ нь хурцадмал байдал үүсээд байгаа хэдий ч дипломат харилцаа явагдаж байгаа нь эерэг шинж тэмдэг гэж үзэж болох юм.
Украины асуудлаарх сөргөлдөөн энэ долоо хоногт Оросын зах зээлд хямрал үүсгэж, лхагва гарагт рублийн ханш дахин уналаа.
Ирэх сард болох хамтарсан сургуулилт хийхээс өмнө их бууны болон тэнгисийн явган цэргийг илгээснээс нэг өдрийн дараа буюу лхагва гарагт Беларусь руу шүхэр-десантын ангийг илгээсэн гэж Интерфакс агентлаг Оросын Батлан хамгаалах яамны мэдээллийн эх сурвалжаас иш татан мэдээлэв. Түүнчлэн Орос Улс Су-35 сөнөөгч онгоцуудаа Беларусь руу "Allied Resolve" сургуулилтад оролцуулахаар шилжүүлж байгаа гэж мэдэгджээ.
Украины хойд хэсэгт орших Беларусьд ОХУ зэвсэгт хүчнээ нэмэгдүүлж байгаа нь довтолгооны шинэ фронтыг бий болгож байх магадлалтай юм.
Үүнээс тусдаа Украин Улстай хиллэдэг өмнөд хэсгийн Ростов муж дахь Оросын их бууны анги Өмнөд цэргийн тойргийн байлдааны бэлэн байдлын шалгалтын хүрээнд лхагва гарагт буудлага хийхээр болсон гэж Батлан хамгаалах яам мэдэгдэв.
Хойд туйлд Оросын байлдааны хөлөг онгоцууд Баренцын тэнгист нэвтэрч, Арктик дахь тээврийн томоохон зурвасыг хамгаалах дадлага хийсэн гэж Хойд флот мэдэгдэв. Москва тэнгисийн цэргийн сургуулилт хийхээр болсноо өнгөрсөн долоо хоногт зарласан юм.
Кремли дэх Украины асуудал эрхэлсэн хэвлэлийн төлөөлөгч Дмитрий Козакийн Парис дахь хэлэлцээ 1100 цагт эхлэх бол хэвлэлийн бага хурал 1400 цагт хийнэ гэж мэдэгдэв.
Украины ерөнхийлөгч Владимир Зеленскийн тамгын газрын дарга Андрей Ермак хэлэхдээ, Украин улс ОХУ-ын дэмжлэгтэй салан тусгаарлагчидтай шууд ярилцахыг үгүйсгэж байна.
Эх сурвалж: Ройтерс
