БНХАУ-ын дарга Ши Жиньпин Монгол Улсын Ерөнхийлөгч Ухнаагийн Хүрэлсүхтэй уулзаж, хоёр орны харилцаа, хамтын ажиллагааг цаашид өргөжүүлэх асуудлаар санал солилцлоо.

Уулзалт Киргизстаны нийслэл Бишкек хотноо болсон Шанхайн хамтын ажиллагааны байгууллагын 2026 оны дээд хэмжээний уулзалтын үеэр болжээ.

Ши Жиньпин уулзалтын үеэр Хятад улс Монгол Улстай харилцан ашигтай хамтын ажиллагааны шинэ чиглэлүүдийг хөгжүүлж, хоёр улсын шинэчлэл, хөгжлийн замд гар гараасаа хөтлөлцөн урагшлахад бэлэн гэдгийг онцолсон байна.

Тэрбээр Хятад, Монгол хоёр улс уул, усаар холбогдсон ойрын хөршүүд бөгөөд энх тайвнаар зэрэгцэн орших, харилцан дэмжих, эв санааны нэгдэлтэй байх, харилцан ашигтай хамтын ажиллагаа нь хоёр орны харилцааны гол чиглэл байсаар ирснийг тэмдэглэв.

Хоёр орны стратегийн харилцан итгэлцлийг бэхжүүлнэ

Ши Жиньпин Хятад улс хөрш орнуудтай харилцах дипломат бодлогодоо Хятад-Монголын харилцааг чухал байр суурьт үргэлжлүүлэн тавьж, стратегийн харилцан итгэлцлийг бэхжүүлэх, харилцан ашигтай хамтын ажиллагааг гүнзгийрүүлэх, иргэд хоорондын харилцаа, холболтыг нэмэгдүүлэхийн төлөө Монголын талтай хамтран ажиллана гэв.

Мөн хоёр тал харилцааны улс төрийн суурийг бэхжүүлж, бие биеийнхээ тусгаар тогтнол, бүрэн эрх, нутаг дэвсгэрийн бүрэн бүтэн байдлыг хүндэтгэхийн зэрэгцээ үндсэн ашиг сонирхол болон анхаарал хандуулж буй асуудлуудыг харилцан хүндэтгэх ёстойг онцолсон байна.

Худалдаа, эрчим хүч, ашигт малтмалын хамтын ажиллагааг өргөжүүлнэ

Хятадын тал хоёр улсын хөгжлийн стратегийг уялдуулах, уламжлалт хамтын ажиллагааны чиглэлүүд болох худалдаа, харилцан холболт, эрчим хүч, ашигт малтмалын салбарын хамтын ажиллагааг цаашид өргөжүүлэхэд бэлэн байгаагаа илэрхийлжээ.

Үүний зэрэгцээ ногоон ашигт малтмал, хиймэл оюун ухаан, дижитал эдийн засаг зэрэг шинээр хөгжиж буй салбаруудад хамтын ажиллагааны боломжийг эрэлхийлэхийг санал болгосон байна.

Ши Жиньпин мөн Монгол Улс дахь Хятадын аж ахуйн нэгжүүдийн хууль ёсны эрх, ашиг сонирхлыг үр дүнтэй хамгаалахыг Монголын талаас хүссэн байна.

Монгол Улс: Хятадтай харилцаагаа гүнзгийрүүлэх нь гадаад бодлогын тэргүүлэх чиглэл

Монгол Улсын Ерөнхийлөгч Ухнаагийн Хүрэлсүх уулзалтын үеэр Монгол, Хятад хоёр улс олон улсын нөхцөл байдал өөрчлөгдсөн ч харилцан хүндэтгэл, итгэлцэлд тулгуурласан сайн хөршийн харилцаагаа хадгалж ирсэн гэдгийг онцолжээ.

Тэрбээр Хятадын хөгжлийн явц нь хөрш орнуудад томоохон боломж бий болгож, Ази болон дэлхийн хөгжлийг дэмжиж байгааг тэмдэглэсэн байна.

Ерөнхийлөгч Хүрэлсүх Хятадтай найрсаг хамтын ажиллагааг гүнзгийрүүлэх нь Монгол Улсын гадаад бодлогын тэргүүлэх чиглэлүүдийн нэг болохыг онцолж, улс төрийн харилцан итгэлцлийг бэхжүүлэх, худалдаа, хөрөнгө оруулалт, аж үйлдвэр, хөдөө аж ахуй, уул уурхай, ногоон эдийн засгийн салбарын хамтын ажиллагааг өргөжүүлэхэд Монголын тал бэлэн гэв.

Монгол Улс “Нэг Хятад” зарчмыг тууштай баримтална

Уулзалтын үеэр Монгол Улс “Нэг Хятад” зарчмыг тууштай баримталж, Тайванийг БНХАУ-ын нутаг дэвсгэрийн салшгүй хэсэг гэж хүлээн зөвшөөрдөг байр сууриа дахин илэрхийлжээ.

Мөн Шинжаан, Төвөд болон Хонконгтой холбоотой асуудлыг БНХАУ-ын дотоод хэрэг гэж үздэгээ Ерөнхийлөгч У.Хүрэлсүх хэлсэн байна.

Тэрбээр Ши Жиньпиний дэвшүүлсэн дэлхийн хэмжээний дөрвөн санаачилга болон хүн төрөлхтний хувь заяаны нэгдмэл хамтын нийгэмлэг байгуулах үзэл баримтлал нь дэлхийн энх тайван, аюулгүй байдлыг хангах, тогтвортой хөгжлийг дэмжих, дэлхий нийтийн сорилтыг шийдвэрлэхэд чухал ач холбогдолтой гэж үзэж буйгаа илэрхийлэв.

Монгол Улс эдгээр санаачилгыг хамтран хэрэгжүүлэх чиглэлээр Хятадтай цаашид хамтран ажиллахад бэлэн байгаагаа мэдэгдсэн байна.

Эх сурвалж: Xinhua