Apple компани энэ жилийн хамгийн их хүлээлт үүсгэсэн бүтээгдэхүүний арга хэмжээгээ 2026 оны есдүгээр сарын 9-нд зохион байгуулахаар албан ёсоор зарлалаа. “Surprise and Shine” нэртэй арга хэмжээ Apple-ийн анхны томоохон бүтээгдэхүүний танилцуулга гэдгээрээ ч онцлог.

Энэ удаагийн арга хэмжээний гол дүр нь энгийн iPhone 18 биш, харин iPhone 18 Pro, iPhone 18 Pro Max болон Apple-ийн анхны эвхэгддэг iPhone байх төлөвтэй байна.

Харин стандарт iPhone 18, iPhone 18e болон дараагийн iPhone Air загваруудыг Apple 2027 оны хавар танилцуулах боломжтой аж.

A20 Pro: 2 нанометрийн эрин эхлэх үү?


iPhone 18 Pro-ийн хамгийн том шинэчлэлүүдийн нэг нь гаднаасаа харагдахгүй.

Apple-ийн дараагийн үеийн A20 Pro процессорыг TSMC-ийн 2nm технологид суурилан үйлдвэрлэх тухай мэдээлэл салбарын эх сурвалжуудад гарч байна.

2nm үйлдвэрлэлийн технологи нь транзисторын нягтыг нэмэгдүүлж, гүйцэтгэл болон эрчим хүчний үр ашгийг сайжруулах боломжтой. Өөрөөр хэлбэл шинэ iPhone зөвхөн хурдан биш, ижил ажлыг бага эрчим хүчээр хийх боломжтой болох нь гол давуу тал юм.

Dynamic Island жижигрэх магадлалтай


iPhone-ийн дэлгэцийн дээд хэсэгт байрлах Dynamic Island-ийн хэмжээ багасах тухай мэдээлэл явж эхэлсэн бөгөөд Apple Face ID-ийн зарим технологийг дэлгэцийн доор байрлуулах боломжийг судалж байгаа нь урд талын тасалдал багатай, илүү цэвэр дэлгэцтэй болох алхам юм.

Камерын хамгийн сонирхолтой шинэчлэл


iPhone 18 Pro-ийн камерын системд Apple олон жилийн дараа илүү мэдэгдэхүйц оптик өөрчлөлт хийхээр төлөвлөж байгаа гэх мэдээлэл байна. Тодруулбал, variable aperture буюу хувьсах диафрагмтай үндсэн камер ашиглах боломжтой.

Энгийнээр тайлбарлавал камер гэрлийн нөхцөлөөс шалтгаалан линзээр нэвтрэх гэрлийн хэмжээг өөрчлөх боломжтой болно.

Ингэснээр гэрэл багатай үед илүү сайн зураг авах, хөрөг зурагт фокусын гүнийг илүү нарийн удирдах,
хурц гэрэлтэй нөхцөлд дүрсний чанарыг сайжруулах
боломж нэмэгдэнэ.

Apple өөрийн C2 modem-оо гаргана


Apple компани Qualcomm-оос хамааралтай байдлаа багасгах зорилгоор өөрийн cellular modem технологийг хөгжүүлж байгаа.

iPhone 18 Pro болон Pro Max-д C2 modem ашиглах тухай мэдээлэл гарсан бөгөөд энэ нь Apple-ийн өөрийн модемийн дараагийн үеийн шийдэл байх төлөвтэй. Энэ нь сүлжээний гүйцэтгэлээс гадна эрчим хүчний хэрэглээ, Apple-ийн hardware болон software уялдаанд чухал ач холбогдолтой байж болно.



Satellite connectivity улам хөгжиж магадгүй


Apple сүүлийн жилүүдэд хиймэл дагуулын холболтын боломжийг iPhone утсандаа үе шаттайгаар нэмэгдүүлж байгаа. iPhone 18 Pro дээр satellite connectivity-г өргөжүүлж, илүү олон төрлийн харилцаа холбооны боломж ашиглах тухай мэдээлэл байна. Хэрэв хэрэгжвэл үүрэн холбооны сүлжээгүй газар iPhone ашиглах боломж улам нэмэгдэнэ гэсэн үг. Гэхдээ энэ функц улс бүрт ижил хэмжээнд ажиллах эсэх нь тусдаа асуудал.

Шинэ өнгө: Dark Cherry


Энэхүү шинэ Pro загваруудын өнгөний сонголт ч анхаарал татаж байна. Хамгийн их яригдаж буй хувилбар нь Dark Cherry буюу гүн интоорын өнгө. Үүнээс гадна хар, мөнгөлөг, цайвар цэнхэр зэрэг өнгөний сонголт байгаа ба өнгөний сонголтоороо бүтээгдэхүүний нүүр царайг бий болгодог учраас энэ жилийн шинэ өнгө хэрэглэгчдийн сонирхлыг илүү татах нь тодорхой.

Харин хамгийн том сюрприз нь iPhone 18 биш байж магадгүй


Apple энэ жил анхны эвхэгддэг iPhone-оо танилцуулах төлөвтэй байгаа нь хамгийн том мэдээ болоод байна. Одоогоор уг бүтээгдэхүүнийг iPhone Ultra гэж нэрлэх боломжтой бөгөөд ном шиг эвхэгддэг загвартай, дэлгэгдсэн үедээ iPad mini-тэй ойролцоо хэмжээний дэлгэцтэй байх тухай мэдээлэл бий.

Apple эвхэгддэг утасны зах зээлд Samsung болон бусад үйлдвэрлэгчдээс нэлээд хожуу орж байгаа ч бүтээгдэхүүнээ iPhone-ийн экосистемтэй маш гүн холбож чадвал зах зээлд хүчтэй нөлөө үзүүлэх боломжтой гэж дүгнэж байгаа юм.

Тэгвэл iPhone 18 Pro үнэхээр хувьсгал уу?

iPhone 18 Pro-ийн дизайн iPhone 17 Pro-оос эрс өөрчлөгдөхөөс илүү доторх технологийн шинэчлэлд төвлөрөх бололтой. Гэхдээ 2nm A20 Pro, хувьсах диафрагмтай камер, жижиг Dynamic Island, C2 modem зэрэг хэд хэдэн шинэ технологи нэг дор хэрэгжвэл энэ нь Apple-ийн сүүлийн жилүүдийн хамгийн сонирхолтой шинэчлэлүүдийн нэг болж чадна.

Хамгийн гол нь Apple энэ бүхнийг удаан хүлээлгэсэн эвхэгддэг iPhone-той хамт танилцуулж магадгүй байгаа нь 2026 оны Apple Event-ийг онцгой болгож байна.

Есдүгээр сарын 9-нд Apple үнэхээр “Surprise and Shine” хийх үү?

Хариултыг тун удахгүй харна.