/2024.01.09/: Хятадад цэргийн нууц мэдээлэл өгсөн гэдгээ хүлээн зөвшөөрсөн АНУ-ын тэнгисийн цэргийн офицер хоёр жил гаруй шоронд хоригдохоор боллоо.
26 настай Вэнхен Жао өнгөрсөн аравдугаар сард Хятадын тагнуулын байгууллагаас авлига авсан хэргээ хүлээсэн юм.
Жао нь Калифорнийн тэнгисийн цэргийн баазад ажилладаг офицер байсан аж.
Тэрээр 2021-2023 он хүртэл цэргийн сургуулилт, ажиллагааны захиалга, чухал дэд бүтцийн талаарх мэдээллийг БНХАУ-ын талд дамжуулсан гэж АНУ-ын албаны хүмүүс мэдэгдсэн юм.
Тодруулбал, тэрээр АНУ-ын Тэнгисийн цэргийн хүчин Энэтхэг-Номхон далайн бүс нутагт хийж буй томоохон сургуулилтуудын талаарх мэдээлэл мөн Японы Окинава арал дахь АНУ-ын баазад байрлах радарын системийн цахилгаан диаграмм, зураг төслийг дамжуулсан байна.
Окинава дахь АНУ-ын Тэнгисийн цэргийн бааз нь Ази дахь үйл ажиллагаанд чухал үүрэг гүйцэтгэдэг. АНУ "Энэтхэг-Номхон далай" бүс нутгийг аюулгүй байдлын тэргүүлэх чиглэл болгож, харин Хятадын цэргийн хүчээ нэмэгдүүлэхийн тулд тэнд эвслээ бэхжүүлэхээр ажиллаж байна.
Жао нь Вентура муж дахь Тэнгисийн цэргийн баазад ажиллаж байсан бөгөөд "мэдээлэл цуглуулах, бүртгэх" зорилгоор тусгайлан цэргийн болон тэнгисийн цэргийн байгууламжид нэвтэрсэн гэж АНУ-ын Хууль зүйн яам мэдэгдэв.
Мөн тэрээр мэдээлэл дамжуулахын тулд "шифрлэгдсэн харилцааны нарийн арга" хэрэглэж, нотлох баримтыг устгаж, Хятадын тагнуултай харилцсан харилцаагаа нуун дарагдуулсан байна.
Тэрээр 2021 оны наймдугаар сараас 2023 оны тавдугаар сарын хооронд дор хаяж 14 удаа, нийтдээ 14,866 долларын хахууль авсан байна.
Жао бол Хятадад төрсөн АНУ-ын иргэн юм. Тэрээр 2009 онд АНУ-д цагаачилж, 2012 онд иргэн болж, таван жилийн дараа тэнгисийн цэргийн хүчинд элссэн байжээ.
Түүнийг өнгөрсөн наймдугаар сард Калифорнид баривчилсан юм.
Өнгөрөгч даваа гарагт Калифорнийн дүүргийн шүүх түүнийг 27 сар хорих шийдвэр гаргасан бөгөөд тэрээр 20 жилийн хорих ял авч болох байв.
Аравдугаар сард Жао буруутай гэдгээ хүлээн зөвшөөрсний дараа АНУ-ын Хууль зүйн яамны Ерөнхий прокурорын туслах Мэтью Олсен хэлэхдээ, Хятадын тагнуулын алба "Цэргийн эрх бүхий албан тушаалтнуудыг идэвхтэй эрэн хайж, засгийн газрын нууц мэдээллийг авахын тулд тэднийг мөнгөөр уруу татахыг эрэлхийлж байна" гэжээ.
Эх сурвалж: ВВС
