/2023.11.02/: Израилын тал өчигдөр Газын умард хэсэгт орших хүн ам шигүү суурьшсан Жабаля дүрвэгсдийн хуаранг хоёр дахь удаагаа бөмбөгдлөө.
Үүний хариуд улс орнууд дипломат арга хэмжээ авч, Хамас бүлэглэлийн эсрэг Газа дотор хийж буй Израилын үйл ажиллагааг буруушааж, НҮБ дайны гэмт хэргийн талаар сэрэмжлүүлэв.
Бөмбөгдөлтөөс хэдхэн цагийн дараа далайн эргийн хойд хэсэгт байрлалтай үлдсэн цөөхөн эмнэлгүүдийн нэгнийх нь үндсэн генератор ажиллахаа больсон гэж мэдэгдлээ.
Жабаля дүрвэгсдийн хуаранд хоёр дахь удаагаа их хэмжээний цохилт өгснөөр баазын Фаллужа орчмын хэд хэдэн барилгыг сүйтгэж, гүн тогоо үүсгэсэн байна.
Хоёр дахь цохилт: ХАМАС-ын удирддаг Газын иргэний хамгаалалтынхан лхагва гарагт хуаранд хийсэн агаарын цохилтыг "хоёр дахь аллага" гэж тайлбарлав. Газын Индонезийн эмнэлгийн захирал, доктор Атеф Аль Кахлоутын хэлснээр, дайралтад 80 хүн амиа алдаж, олон зуун хүн шархадсан байна. Нуранги доороос нэмж цогцсууд гаргасаар байгаа бөгөөд амь үрэгдэгсдийн дийлэнх нь эмэгтэйчүүд, хүүхдүүд байжээ. Израилын Батлан хамгаалах хүчин (IDF) лхагва гарагт болсон халдлага нь ХАМАС-ын удирдлага болон удирдлагын цогцолборыг онилсон бөгөөд "тагнуулын мэдээлэлд үндэслэн" Хамасын террористуудыг устгасан" гэж мэдэгдэв. Мягмар гарагт Израилын нисэх онгоцууд уг хуаранд цохилт өгснөөс нэг өдрийн дараа энэ цохилт болсон бөгөөд эмч нар Газын зурваст энгийн номхон иргэдийн амь нас эрсдэж байгааг эсэргүүцэж, эсэргүүцлээ илэрхийлжээ.
Генератор унтарлаа: Газын Индонезийн эмнэлгийн гол генератор лхагва гарагийн орой ажиллахаа больсон гэж Аль Калуут өнөөдөр мэдэгдэв. Израилын агаарын довтолгооны үеэр шархадсан олон тооны хүмүүс Газын хойд хэсэгт эрүүл мэндийн тусламж үйлчилгээ үзүүлэх гол тулгуур гэж тооцогддог тус эмнэлэгт хэвтэн эмчлүүлж байна.
Дайны гэмт хэргийн сэрэмжлүүлэг: НҮБ-ын Хүний эрхийн алба "Газын хамгийн том дүрвэгсдийн хуаран болох Жабаля руу хийсэн халдлагаас болж энгийн хүн маш ихээр амь үрэгдсэн бөгөөд сүйрлийн цар хүрээ зэргийг харгалзан үзэхэд дайны гэмт хэрэг болж болзошгүй" гэж олон нийтийн сүлжээнд бичжээ. Рамалла дахь Палестины Эрүүл мэндийн яамнаас ХАМАС-ын хяналтад байдаг бүс нутгийн эх сурвалжаас авсан мэдээллээр Газын зурваст долоо хоног үргэлжилсэн Израилын бөмбөгдөлтийн улмаас 8700 хүн амиа алдсан байна.
Газад гацсан 2 сая хүний тал нь хүүхэд: НҮБ-ын Палестины дүрвэгсдийн асуудал эрхэлсэн агентлагийн дарга "Дайны хөлд нэрвэгдсэн Газын зурваст гацсан 2 сая гаруй хүний тал нь хүүхэд байсан. Гамшгийн цар хүрээ нь урьд өмнө хэзээ ч байгаагүй том эмгэнэлт явдал юм. Тэд зүгээр л ус, хоол хүнс гуйж байсан энгийн иргэд байсан. Хүүхдүүд сургуульд сурч байхын оронд нэг балга ус, зүсэм талх гуйж байсан юм” гэв.
Рафах гарцаар нэвтэрч эхлэв: Дайн эхэлснээс хэдэн долоо хоногийн дараа анх удаа бүслэгдсэн бүс нутгаас шархадсан Палестинчууд болон олон зуун гадаадын иргэд Газын зурвасаас Рафах хилийн боомтоор Египет рүү нэвтэрч эхлэв. Тэдний дотор 360 гаруй гадаадын иргэн байгаагийн олонх нь Палестины давхар иргэншилтэй хүмүүс байгаа гэж Египетийн албаны хүн ярьжээ. Шархадсан 45 Палестинчууд Египетэд эмчилгээ хийлгэж байна гэж Египетийн албаны хүн CNN-д ярьжээ.
Эх сурвалж: CNN
