/2023.05.12/: МИАТ ХК ирэх зургаадугаар сараас эхлэн 16-аас доош насны хүүхдүүдийг тийзний үнээс чөлөөлхөөр болсонтой холбогдуулан мэдэгдэл гаргажээ.
Уг мэдэгдэлд "Нийгмийн хариуцлагын хүрээнд МИАТ ТӨХК Эх үрсийн баяр, сурагчдын амралтыг тохиолдуулан Улаанбаатар-Хонконг-Улаанбаатар, Улаанбаатар-Бээжин-Улаанбаатар, Улаанбаатар-Гуанжоу-Улаанбаатар чиглэлд хөнгөлөлт зарласан билээ. Хүүхэд багачууддаа зориулан гаргасан тус урамшуулалтай холбоотой манай Мэдээлэл лавлагаа, тийз захиалгын 11-333-999 дугаарын ачаалал нэмэгдсэний улмаас үйлчлүүлэгчдэдээ чирэгдэл учруулсанд Та бүхнээс хүлцэл өчиж байна.
МИАТ ТӨХК 2023 оны 6 дугаар сараас эхлэн аялал жуулчлалыг дэмжих зорилгоор Хонконг болон Бээжингийн чиглэлдээ нислэгийн давтамжаа 7 хоногийн 7 болгон нэмэгдүүлж, зорчигч үйлчлүүлэгчдэдээ урамшуулалтай үнэ санал болгон ажиллаж байна.
Дээрх гэр бүлийн урамшууллын талаарх ойлголтод аливаа нэгэн ялгаварлан гадуурхах нөхцөл тавигдаагүй бөгөөд тус урамшуулалд хамрагдах 0-16 насны хүүхэдтэй хамт зорчих аливаа нэгэн асран хамгаалагчид эрх бүхий “асран хамгаалагч” гэх баримт бичгийг үндэслэл болгож байгааг үүгээр мэдэгдье.
Тус урамшууллын хүрээнд асран хамгаалагчийн хамт зорчиж буй 0-16 насны хүүхэд багачууддаа тийзний үнээс бүрэн хөнгөлж зөвхөн такс, хураамжаа төлөн аялах боломжийг олгож байгаа юм" гэжээ.
Эх сурвалж: МИАТ
