/2022.03.20/: Бразилийн Амазоны ширэнгэн ойд бараг дөрвөн долоо хоногийн турш төөрсөн нутгийн уугуул хоёр хүүг олж эмнэлэгт хүргэсэн байна.
Найм, зургаан настай Глауко, Глейсон Феррейра нар хоёрдугаар сарын 18-нд Амазонас мужийн Маникоре хотын ойролцоох ширэнгэн ойд жижиг шувуу барих гэж байгаад төөрчээ.
Орон нутгийн мод зүсэгч тэднийг мягмар гарагт санамсаргүйгээр олжээ. Тэд хоол тэжээлийн дутагдлын улмаас эмнэлэгт эмчлүүлэх шаардлагатай байгаа бөгөөд эмчилгээний дараа л бүрэн эдгэрэх төлөвтэй байна.
Хөвгүүдийг алга болсны дараа олон зуун оршин суугчид долоо хоног хайж байсан. Гэвч ширэнгэн ойг энгийн үеээс хавьгүй хэцүү болгодог Амазоны борооны улирал таарч эрэн хайх ажиллагааг цааш үргэлжлүүлж чадаагүй байна.
Онцгой байдлын алба хоёрдугаар сарын 24-нд эрэн хайх ажиллагааг зогсоохоор шийдсэн ч нутгийн иргэд хөвгүүдийг эрэн хайх ажиллагааг үргэлжлүүлсэн гэж орон нутгийн Амазониа Реал мэдээлэв.
Бараг дөрвөн долоо хоногийн дараа хөвгүүд эцэг эхийнхээ хамт амьдардаг Лаго Капанагийн дархан цаазат газрын Палмейра тосгоноос 6 км (3.7 миль) зайд мод огтолж байхад нь олсон гэж Амазониа Реал нэмж хэлэв.
Нутгийн хүн ойролцоох модыг цохиж байгааг сонсоод тэдний нэг нь тусламж гуйн хашгирав. Дуудлагын дагуу тэр хүн хоёр хүүг ширэнгэн ойд өлсөж, сул дорой, арьс нь олон зулгарсан байдалтай хэвтэж байхыг олжээ.
Орон нутгийн хэвлэл мэдээллийн хэрэгслүүдийн мэдээлснээр хүүхдүүд төөрч байхдаа юу ч идээгүй, борооны ус л уусан гэж хэлсэн байна.
Эх сурвалж: ВВС
