ЭНЭХҮҮ МЭДЭЭЛЭЛ НЬ БАЙНГА ШИНЭЧЛЭГДЭН, НЭМЭГДЭЖ БАЙГААГ АНХААРНА УУ

/2022.03.02/ Ал Жазийра: Нүүлгэн шилжүүлэлтийн асуудлын улмаас Энэтхэг оюутан амиа алджээ

Дайнд нэрвэгдсэн Украины Харьков хотод нэг Энэтхэг оюутан буудуулан амь үрэгдсэн тухай Энэтхэгийн гадаад хэргийн яам мэдээлээд Украин улсаас оюутнуудыг нүүлгэн шилжүүлэх ажлын талаар Шинэ Дели шүүмжиллээ.

Яамны хэвлэлийн төлөөлөгч Ариндам Багчи мягмар гарагт Твиттер хуудсандаа "Гадаад хэргийн сайд Орос болон Украины Элчин сайдуудыг дуудаж, Харьков болон мөргөлдөөнтэй байгаа бусад хотуудад оршин суугаа Энэтхэгийн иргэдийг яаралтай аюулгүй хил нэвтрүүлэхийг шаардлаа" гэж мэдэгджээ.

Хуучин ЗХУ-ын бүрэлдэхүүнд байсан бүгд найрамдах улс руу довтлох ажиллагаа зургаа дахь өдрөө үргэлжилж байгаа энэ үед Оросын арми их буугаар буудаж, Харьков болон бусад томоохон хотуудыг бүслээд байна гэж Украины албаны хүн мэдэгдэв.

Энэтхэгийн хэвлэл мэдээллийн хэрэгслүүдийн мэдээлснээр нас барсан оюутныг Навин Шекхараппа гэдэг бөгөөд Украинд анагаах ухааны чиглэлээр суралцдаг байжээ. Оюутан Харьков хотоос гарах зам хайж байгаад нас барсан гэж түүний өрөөний хамтрагч Энэтхэгийн NDTV сувагт ярьжээ.

“Тэрээр амбан захирагчийн байшингийн ойролцоо амьдардаг байсан бөгөөд хоол, хүнсээ авахаар дараалалд зогсож байсан ба гэнэт агаарын цохилт болж амбан захирагчийн байшин дэлбэрсэний улмаас амиа алдсан” гэж Харьков дахь Энэтхэг оюутны зохицуулагч Пужа Прахараж NDTV-д ярьжээ.

Украины засгийн газрын мэдээллээс үзэхэд Украин дахь 76,000 гадаад оюутны дөрөвний нэгийг Энэтхэгчүүд эзэлдэг байна.

Шинэ Дели өнгөрсөн сард 4000 орчим энэтхэгчүүдийг нүүлгэн шилжүүлсэн ч Энэтхэгийн гадаад хэргийн яамны хамгийн сүүлийн үеийн мэдээллээр 16000 орчим хүн гацаад байгаа ажээ. Өчигдөр өглөө /гуравдугаар сарын 1/Украин дахь Энэтхэгийн элчин сайдын яам мөн зөвлөмж гаргаж, Энэтхэг оюутнуудыг "Яаралтай Киев хотыг орхихыг" хүссэн байна.

Энэтхэгийн засгийн газар оюутнуудыг тус улсаас гарган авах ажиллагаанд туслах зорилгоор холбооны дөрвөн сайдыг Украины хөрш орнууд руу илгээжээ.

Гэвч Украинд гацсан олон оюутнууд Энэтхэгийн засгийн газрын аврах хүчин чармайлтыг шүүмжилж, олон нийтийн мэдээллийн хэрэгслээр тэдний зовлон зүдгүүрийг онцолсон олон тооны видеог нийтэлсэн байна.

Энэтхэгийн хэвлэл мэдээллийн хэрэгслүүдийн мэдээлснээр Энэтхэгийн зарим оюутнуудыг хөрш орнууд руу нэвтрүүлэхгүй байгаа бөгөөд хилийнхэн тэднийг нэвтрүүлэхгүй, мөнгө нэхэж байгаа гэх мэдээлэл байна.

"Би Украйны хилийн ойролцоо зогсоод Румын руу орох ээлжээ хүлээж байтал хэдэн харуулууд Энэтхэг оюутнууд руу буу тулган, тэдний хэл амаар доромжилж байгааг харлаа" гэж нэгэн оюутны хэлснийг Times of India иш татжээ.

"Hindustan Times" сонин Украины зүүн хэсэгт амьдардаг оюутан Ишика Саркарын видео бичлэгээс иш татан, тус нутагт байгаа энэтхэг оюутнууд бункерт хорогдож байгаа бөгөөд хоол хүнсний хомсдолд орсон хэмээн мэдээлжээ.

Энэтхэгийн сөрөг хүчний удирдагч Рахул Ганди мягмар гарагт засгийн газрыг Украин дахь Энэтхэг оюутнуудыг аюулгүй нүүлгэн шилжүүлэх стратегийн төлөвлөгөө гаргаагүй хэмээн шүүмжлээд өөрийн твиттер хуудсандаа "Хором бүр үнэ цэнэтэй" гэж бичжээ.

/2022.03.01/ Хоёрдугаар сарын 24-нд Владимир Путин Москвагийн цагаар өглөөний 5:30 цагт Украинд "цэргийн тусгай ажиллагаа" эхлүүлэх" тухай зарлав.

CNN 16:29 цаг: Харьковт засгийн газрын байр руу пуужин харваснаас 6 хүн шархаджээ

Украины хоёр дахь том хот Харьковт болсон дэлбэрэлтийн улмаас дор хаяж зургаан хүн гэмтэж бэртсэний нэг нь хүүхэд байна гэж Украины Онцгой байдлын алба Telegram хуудсандаа мэдэгджээ.

Украины Гадаад хэргийн яам (ГХЯ) болон Украины засгийн газрын албан тушаалтнуудын нийтэлсэн үйл явдлын дүрс бичлэгээс үзвэл, дэлбэрэлтийн улмаас засгийн газрын байр нурсан байна. Бичлэгүүдийг орон нутгийн цагаар мягмар гарагийн өглөө олон нийтийн сүлжээнд нийтэлсэн бөгөөд энэхүү бичлэгийг CNN баталгаажуулжээ.

“Орос улс олон улсын хүмүүнлэгийн хуулийг зөрчин дайн хийж байна. Энгийн иргэдийг алж, иргэний дэд бүтцийг сүйтгэдэг. ОХУ-ын гол бай бол одоо пуужингаар харваж байгаа томоохон хотууд юм” гэсэн тайлбартайгаар Украины ХЯА мягмар гарагт твиттер хуудсандаа тэрхүү дүрс бичлэгийг хуваалцжээ.

Бүс нутгийн төрийн захиргааны байранд орон нутгийн засаг захиргааны байгууллагууд байрладаг. Тус байр нь Харьковын төв талбай, архитектурын дурсгалт газар болох "Эрх чөлөөний талбай"-д байрладаг ажээ.

Украины Дотоод хэргийн сайдын зөвлөх Антон Геращенко мөн Эрх чөлөөний талбайн гудамжнаас авсан бичлэгээ албан ёсны Telegram хаягаараа хуваалцжээ. Бичлэгт дэлбэрэлт болсон газар болон Харьков мужийн төрийн захиргааны барилга байсан газрыг харуулсан байна.

13:01 цаг Aljazeera: АНУ НҮБ-ын төлөөлөгчийн газраас Оросын 12 дипломатчийг хөөнө

АНУ Москвагаас Нью-Иорк дахь НҮБ-д суугаа төлөөлөгчийн газраас Оросын 12 дипломатчийг хөөхөөр төлөвлөж байгаагаа зарлалаа.

Даваа гарагт хийсэн мэдэгдэлдээ НҮБ-д суугаа АНУ-ын төлөөлөгчийн газар дипломатчдыг “Манай үндэсний аюулгүй байдалд сөргөөр нөлөөлж буй тагнуулын үйл ажиллагаа явуулсан” хэргээр хөөх үйл явцыг эхлүүлсэн гэж мэдэгдэв. Үүгээрээ дипломатуудыг "тагнуулын ажилтнууд" гэж тодорхойлжээ.

ОХУ-ын НҮБ-д суугаа Элчин сайд Василий Небензиа АНУ-ын энэ үйлдлийг "дайсагнасан" үйлдэл гэж буруушааж, дипломатчдыг гуравдугаар сарын 7-ны дотор орхин явахыг хүссэн гэж сэтгүүлчдэд мэдэгдэв.

ОУЭШ мөрдөн байцаалтын ажиллагаа явуулахаар төлөвлөж байгаагаа зарлалаа

Олон улсын эрүүгийн шүүхийн (ОУЭШ) прокурор ОХУ-ын Украинд түрэмгийлсэнтэй холбогдуулан мөрдөн байцаалтын ажиллагаа явуулахаар төлөвлөж байгаа бөгөөд дайны гэмт хэрэг үйлдсэн гэж үзэх “боломжийн үндэслэл” байгаа гэж мэдэгдэв.

Карим А Хан хэлэхдээ, мөрдөн байцаалт нь "Украины нутаг дэвсгэрийн аль ч хэсэгт мөргөлдөөнд оролцогч аль нэг талын үйлдсэн гэх гэмт хэргийг шалгана" гэж түүний ажлын алба "аль болох хурдан" мөрдөн шалгах болно гэж нэмж хэлэв.

"Украины нутаг дэвсгэрт дайны болон хүн төрөлхтний эсрэг гэмт хэрэг үйлдэгдсэн гэж үзэх үндэслэл бий" гэж Хан мэдэгдэлдээ дурджээ.

Цагаан ордон: ОХУ-ын нислэгийг хориглох талаар хэлэлцэж байна

ОХУ-ын онгоцнуудыг АНУ-ын дээгүүр нислэг үйлдэхийг хориглох боломжгүй гэж Цагаан ордон мэдэгдсэн ч энэ талаар шийдвэр гараагүй байна.

Цагаан ордны хэвлэлийн нарийн бичгийн дарга Жен Псаки сэтгүүлчдэд "Ямар ч сонголт байхгүй" гэж мэдэгджээ. Ази болон дэлхийн бусад хэсэгт хүрэхийн тулд ОХУ-ын дээгүүр нисдэг АНУ-ын олон агаарын тээврийн компаниуд байгааг Псаки тэмдэглэв. "Бид олон хүчин зүйлийг харгалзан үздэг" гэж тэр хэлэв.

ЕХ Орост нэмэлт 26 хориг арга хэмжээ авлаа

Европын холбоо Оросын олигархиуд, өндөр албан тушаалтнууд, эрчим хүчний даатгалын компани зэрэг 26 хүнд хориг арга хэмжээ авснаар нийт хориг 680-д хүрсэн байна.

ЕХ-ны төв байрнаас мэдээлснээр, жагсаалтад “газрын тос, банк санхүү, санхүүгийн салбарт идэвхтэй үйл ажиллагаа явуулдаг олигархиуд, бизнесменүүд”, засгийн газрын албан тушаалтнууд, цэргийн дээд албан тушаалтнууд болон “Украины эсрэг суртал ухуулга түгээж, Украины түрэмгийллийн эсрэг эерэг хандлагыг төлөвшүүлэхэд хувь нэмрээ оруулсан суртал ухуулагчид” багтсан байна.

11:51 цаг Ukranews: Унгар улс үхлийн аюултай зэвсгийг нутаг дэвсгэрээрээ дамжин нэвтрүүлэхгүй

Унгар улс Украин руу цэрэг, зэвсэг илгээхгүй бөгөөд үхлийн аюултай зэвсгийг нутаг дэвсгэрээр нь дамжин нэвтрүүлэхийг зөвшөөрөхгүй гэж Унгарын Гадаад хэрэг, худалдааны сайд Петер Сиярто мэдэгдсэн тухай Ройтерс агентлаг мэдээлэв.

Унгар Украинд цэргийн техник нийлүүлэхгүй, цэргээ илгээхгүй гэж Сиярто мэдэгдэв.

"Ийм шийдвэр гаргах болсон шалтгаан нь ийм хангамж нь дайсагнасан цэргийн ажиллагааны бай болж магадгүй бөгөөд ... бид Унгарын аюулгүй байдлыг хангах ёстой ... ингэхийн тулд бид энэ дайнд хөндлөнгөөс оролцохгүй байх ёстой" гэж Сижарто хэлэв.

Украины мэдээллийн агентлагийн өмнө мэдээлснээр, хоёрдугаар сарын 26-нд Германы Холбооны засгийн газар Украины Зэвсэгт хүчинд танк эсэргүүцэх 1000 зэвсэг, 500 ширхэг "Стингер" зенитийн пуужин өгөх шийдвэрийг баталжээ.

Умард Атлантын эвслийн (НАТО) Ерөнхий нарийн бичгийн дарга Йенс Столтенберг хэлэхдээ, ОХУ Украинд довтолсоноор тус тив дэх энх тайвныг устгасан тул НАТО Украинд зэвсэг, тэр дундаа агаарын довтолгооноос хамгаалах систем нийлүүлсээр байх болно гэжээ.

Хоёрдугаар сарын 25-нд Польшийн Батлан ​​хамгаалахын сайд Мариуш Блашчак Украины зэвсэгт хүчин рүү сум, зэвсэг ачсан ачааны машинуудын цувааг илгээсэн гэж мэдэгдсэн.

11:25 цаг Korea times: Солонгос улс хориг арга хэмжээнд нэгдэн ОХУ-ыг SWIFT-д нэвтрэхийг хориглов

Украинд түрэмгийлсэн ОХУ-ын эсрэг авсан дэлхийн хориг арга хэмжээний хүрээнд Солонгос улс дэлхийн төлбөрийн сүлжээнээс ОХУ-ын банкуудыг хаах олон улсын хамтын нийгэмлэгт нэгдэхээр шийдлээ гэж Сөүлийн Гадаад хэргийн яам Даваа гарагт мэдэгдэв.

Үүнээс гадна Солонгос улс Орос руу стратегийн материал экспортлохыг хориглох төлөвлөгөөтэй байна.

АНУ болон түүний гол холбоотнууд, тэр дундаа Герман, Их Британи улсууд Бямба гарагт Оросын зарим банкийг SWIFT банкны мессежийн системээс хасна гэж мэдэгдсэний дараа ийм шийдвэр гаргажээ. SWIFT нь хил дамнасан төлбөр тооцоог түргэн шуурхай гүйцэтгэх боломжийг олгодог Дэлхийн банк хоорондын санхүүгийн цахилгаан холбооны нийгэмлэгийн товчоо юм.

ОХУ-ын цэргийн түрэмгийллийг эсэргүүцэн Солонгос улс олон улсын хориг арга хэмжээнд нэгдэнэ гэж Ерөнхийлөгч Мүн Жэ Ин пүрэв гарагт мэдэгдсэн.

"Солонгосын засгийн газар ОХУ-ыг SWIFT-ээс гаргах олон улсын хамтын нийгэмлэгтэй нэгдэх бөгөөд тодорхой төлөвлөгөөг холбогдох яамдууд хэлэлцсэний дараа шийднэ" гэж ГХЯ-ны мэдэгдэлд дурджээ. Засгийн газар шийдвэрийнхээ талаар дипломат шугамаар АНУ-д мэдэгдсэн гэж мэдэгдэв.

Цагаан ордны мэдээлснээр, SWIFT-ээс ОХУ-ыг хасах нь Оросын эдийн засагт шууд нөлөөлнө, учир нь төлбөр хийхдээ "утас эсвэл факс" ашиглах шаардлагатай болно гэсэн таамагтай байгаа ажээ. Нэмж дурдахад энэхүү арга хэмжээ нь Оросын орлогын 40 гаруй хувийг бүрдүүлдэг газрын тос, байгалийн хийн олборлолтоос ашиг олоход саад болно гэж үзэж байна.

Стратегийн материалын экспортын хяналтын тухай ярих юм бол Сөүлээс олон талт экспортын хяналтын дөрвөн дэглэм буюу Цөмийн ханган нийлүүлэгчдийн групп (NSG); Вассенаарын зохицуулалт (WA); Австралийн групп (AG); болон пуужингийн технологийн хяналтын дэглэмийг (MTCR) дагаж мөрөх бөгөөд тэд үй олноор хөнөөх зэвсэг, түүнийг хүргэх машин, холбогдох технологи, тоног төхөөрөмжийн тархалтыг зогсоох юм.

Түүнчлэн Солонгос улс хагас дамжуулагч, компьютер, харилцаа холбоо, мэдээллийн аюулгүй байдлын төхөөрөмж, лазер, мэдрэгч зэрэг стратегийн бус материал, АНУ-д үйлдвэрлэсэн бараа, эсвэл Америкийн тоног төхөөрөмж, программ хангамж ашиглан үйлдвэрлэсэн гадаадын бараа бүтээгдэхүүнийг хамрах эсэхийг хянаж байна.

Түүнээс гадна дэлхийн эрчим хүчний зах зээлийг тогтворжуулахын тулд стратегийн газрын тосны нөөцийг гаргаж, шингэрүүлсэн хийг Европт дахин худалдах асуудлыг эргэн харахаар Засгийн газар шийдвэрлэсэн.

Мөн ГХяам олон улсын хамтын нийгэмлэгтэй хамтран хүмүүнлэгийн тусламжаа нэмэгдүүлнэ гэж мэдэгдэв.

Украин бол Солонгосын олон улсын хамтын ажиллагааны агентлагийн түнш орнуудын нэг юм.

Вашингтон АНУ-аас гарал үүсэлтэй технологи, бүтээгдэхүүний экспортыг ОХУ-ын 49 цэргийн байгууллага, тэр дундаа Батлан ​​хамгаалах яаманд хориглох бодлого баримталж байгаагаа зарласан.

Вашингтон Сөүлээс Москвагийн эсрэг ийм хатуу экспортын хяналтын арга хэмжээ авахыг хүссэн нь мэдэгдэж байна.

10:00 цаг BBC: Орос цэргүүд энгийн иргэдийн гар утсыг булааж байна

Украины харилцаа холбооны газраас ОХУ-ын утасны дугаарыг тус улсын газар нутагт ашиглах боломжгүй болгосон талаар мэдээлжээ.

Украйны засгийн газрын агентлагаас мэдээлснээр "ОХУ-ын эзлэн түрэмгийлэгчид өөрсдийн утаснаас холбоо барих боломжгүй болсон тул энгийн иргэдийн гар утсыг булааж авч байна" гэж мэдэгджээ.

Тиймээс утсаа алдсан Украины иргэдийг "аль болох шуурхай" утасны операторуудад мэдэгдэхийг хүсэж байгаа аж. Ингэснээр тэдний дугаарыг хааж, ОХУ-ын цэргүүдийн харилцаа холбоог хязгаарлах боломжтой гэж мэдээлжээ.

09:16 цаг CNN: Киев хотын ойролцоох Оросын цэргийн цуваа 40 гаруй миль урт байна

Сансрын хиймэл дагуулын компани болох Maxar Technologies-ийн нийтэлсэн зургуудаас харахад Киев хотын захад ирсэн Оросын цэргийн цуваа өмнөхөөсөө илүү тэлж, урт болсон талаар мэдээллээ.

Өчигдөр орой тус компанийн мэдээлснээр, "ОХУ-ын 40 миль урттай цэргийн цуваа Киевийг чиглэн явж байна" гэжээ. Цэргийн цуваа нь хуягт машин, танк, чирэх их буу болон бусад логистикийн машинуудаас бүрдсэн талаар мөн мэдээлжээ.

Жич: 1 миль нь 1,6 км-тэй тэнцүү.

09:28 цаг Lenta.ru: Орос-Украины хэлэлцээр өндөрлөв

Беларусь-Украины хилийн Гомель мужид Орос, Украины төлөөлөгчдийн хэлэлцээ хоёрдугаар сарын 28-ны даваа гарагт болж өндөрлөв.

Уулзалт таван цаг орчим үргэлжилсэн ба Москвагийн цагаар 14:00 цагийн орчимд Припять голын эрэг дээрх "загасчдын байшин" хэмээх нууц газарт эхэлсэн байна. Аюулгүй байдлын үүднээс түүний байршлыг мэдээлээгүй байна. Уг нь хэлэлцээрийг хоёрдугаар сарын 27-ны үдээс хойш хийнэ гэж төлөвлөж байсан ч саатах болсон шалтгааныг Украины төлөөлөгчид Польшоор дамжин Беларусь руу явахаар болсонтой холбон тайлбарлав.

Оросын төлөөлөгчдийг Ерөнхийлөгчийн туслах, Соёлын сайд асан Владимир Мединский тэргүүлэв. Түүнчлэн ОХУ-ын Гадаад хэргийн дэд сайд Андрей Руденко, ОХУ-аас Беларусь дахь Элчин сайд Борис Грызлов, Төрийн Думын олон улсын хорооны дарга Леонид Слуцкий, Батлан ​​хамгаалахын дэд сайд Александр Фомин нар хэлэлцээрийн багт багтжээ.

Украины төлөөлөгчдийн бүрэлдэхүүнд Батлан ​​хамгаалахын сайд Алексей Резников, Украины Дээд Рада дахь “Ардын зарц” бүлгийн дарга Давид Арахамия, Ерөнхийлөгчийн Тамгын газрын даргын зөвлөх Михайло Подоляк нар багтжээ. Түүнчлэн Беларусийн Гадаад хэргийн сайд Владимир Макей уг арга хэмжээнд зохион байгуулагчаар оролцов. Беларусийн Ерөнхийлөгчийн хэвлэлийн нарийн бичгийн дарга Наталья Эйсмонт хэлэлцээр хийж буй газраас цацагдсан видео бичлэг дээр мөн харагдсан байна.

8:35 цаг Russia today: УКРАИН: Зеленський Европын холбоонд элсэх саналд гарын үсэг зурлаа

Украины Ерөнхийлөгч Володимир Зеленський Даваа гарагт ОХУ тус улсад эхлүүлсэн цэргийн ажиллагааны үеэр Европын холбоонд элсэх албан ёсны саналд гарын үсэг зурлаа.

“Бидний зорилго бол бүх европчуудтай хамт байх, хамгийн чухал нь эрх тэгш байх явдал юм. Энэ нь шударга гэдэгт би итгэлтэй байна. Бид үүнийг хүртэх ёстой гэдэгт би итгэлтэй байна" гэж Зеленський олон нийтийн сүлжээнд нийтэлжээ.

Европын холбоонд элсэх хүсэл эрмэлзлийг тус холбооны дээд албан тушаалтнууд илт эргэлзээтэй хүлээж авч, хурдан дэвших журам ч байхгүй гэдгийг онцлон тэмдэглэв. Энэ үйл явц үр дүнд хүрэхийн тулд олон жил шаардагддаг бол боломжит гишүүн элсэхийн тулд улс төр, эдийн засгийн аль алинд нь олон шалгуурыг хангасан байх ёстой. Тухайлбал, Германы Гадаад хэргийн сайд Анналена Баербок хэлэхдээ, Украиныг "Европын ордон"-ын нэг хэсэг гэж үздэг ч түүнийг өндөрт өргөх нь хэдхэн сарын дотор хийгдэхгүй нь мэдээж.

"Европын холбоо үргэлж үүд хаалга нь нээлттэй байсаар ирсэн учраас бид яг одоо өөр ертөнцөд сэрсэн юм биш" гэж Баербок хэлээд Киевийг тус холбооны гишүүнээр элсүүлэх нь тус улсыг эв нэгдлээс нь салгах гэсэн үг биш гэдгийг нэмж хэлэв.

ЕХ-ны тэргүүн дипломат Жозеп Боррел Украин улсыг өргөмжлөхөд илүү урт хугацаа зааж өгч, гишүүнчлэлд элсэхэд олон жил шаардагдана гэж мэдэгдэв.

Та бүхэн:

28-ны мэдээг ЭНД ДАРЖ

27-ны мэдээг ЭНД ДАРЖ

26-ны мэдээг ЭНД ДАРЖ

25-ны мэдээг ЭНД ДАРЖ,

24-ний мэдээг ЭНД ДАРЖ хүлээн авна уу.