/2022.02.21/: Францын Ерөнхийлөгч Эммануэль Макрон ОХУ-ын удирдагч Владимир Путин, АНУ-ын Ерөнхийлөгч Жо Байден нарын дээд хэмжээний уулзалтыг зохион байгуулахыг санал болгосныг хоёр тал хүлээн зөвшөөрсөн гэж Елисейн ордноос мэдээллээ.
"Ерөнхийлөгч Байден, ерөнхийлөгч Путин нарын хооронд дээд хэмжээний уулзалт хийхийг санал болгосны дараа Европын аюулгүй байдал, стратегийн тогтвортой байдлын асуудлаар оролцогч бүх талуудтай уулзах санал тавьсан байна. Ерөнхийлөгч Байден, Путин нар ийм дээд хэмжээний уулзалт хийх санааг зарчмын хувьд хүлээн зөвшөөрсөн" гэж мэдэгдэлд дурджээ.
Дээд хэмжээний уулзалтын хөтөлбөрийг АНУ-ын Төрийн нарийн бичгийн дарга Энтони Блинкен, ОХУ-ын Гадаад хэргийн сайд Сергей Лавров нар хоёрдугаар сарын 24-нд хийх уулзалтын үеэр бэлтгэнэ гэж Елисейн ордноос мэдээллээ.
Цагаан ордны хэвлэлийн төлөөлөгч Жен Псаки Америкийн удирдагчийн зорилгын талаарх Парисын мессежийг баталжээ.
"Ерөнхийлөгч Байден хэрэв халдлага гарахгүй бол Ерөнхийлөгч Путинтэй дахин уулзахаар зарчмын хувьд тохиролцсон" гэж тэр хэлэв.
Сургуулилт дууссаны дараа Оросын цэргүүд байрлаж байсан газартаа буцсан ч Орос Украинд өдөөн хатгалга бэлтгэж байна гэсэн мэдэгдэл барууны орнуудад гарсаар байна. Батлан хамгаалахын сайд Сергей Шогу хоёрдугаар сарын 14-нд Путинтэй уулзахдаа "сургуулилалтын нэг хэсэг дуусч байна, зарим нь ойрын хугацаанд дуусна" гэж мэдэгдэв. Маргааш нь БХЯ-ны хэвлэлийн төлөөлөгч хошууч генерал Игорь Канашенков хэлэхдээ, өмнөд болон барууны цэргийн тойргууд цэргээ байршуулах газартаа буцааж эхэлсэн байна.
Эх сурвалж: Риа
