/2022.02.14/: Швейцарийн сонгогчид амьтдын эрхийн төлөө тэмцэгчдийн Швейцарь улсыг амьтад дээр эмнэлгийн болон шинжлэх ухааны туршилт хийхийг хориглосон анхны улс болгох саналыг эсэргүүцсэн ч ням гарагт болсон бүх нийтийн санал асуулгаар тамхины сурталчилгаанд хатуу хязгаарлалт тавихыг зөвшөөрчээ.
Швейцарийн уламжлалт шууд ардчиллын зарчмын дагуу явуулсан бүх нийтийн санал асуулгад оролцогсдын дөнгөж 21 хувь нь амьтад дээр хийх туршилтыг хориглохыг дэмжсэн бол 79 хувь нь эсэргүүцсэн байна.
Дэмжигчид туршилтыг ёс зүйгүй, шаардлагагүй гэж үзэн зогсоохыг хүсч байсан ч тус улсын эмийн сангийн хүчирхэг лобби эсэргүүцэлтэй тулгарсан бөгөөд ийм хориг нь эдийн засагт ихээхэн хохирол учруулж болзошгүйг анхааруулав.
Интерфарма лобби группын гүйцэтгэх захирал Рене Бухолзер "Энэхүү хортой санаачилгыг үгүйсгэж байгаад бид баяртай байна. Энэ нь Швейцарийн хүн ам хүмүүсийн эрүүл мэнд, Швейцарийн хөгжил цэцэглэлтийн төлөөх судалгааны гол үүргийг хүлээн зөвшөөрч байгааг харуулж байна" гэв.
"Бид яагаад тэднийг өрөвдөхгүй байгаа юм бэ?" гэж тус хамтарсан кампанит ажлын төлөөлөгч Ренато Верндли хэлэв.
Ням гарагт болсон өөр нэг санал хураалтаар оролцогчдын 57 хувь нь тамхины сурталчилгаанд хатуу хязгаарлалт тавихыг дэмжсэн байна.
Хязгаарлалтууд нь сонин, кино театр, интернет, тоглолтын арга хэмжээ, сурталчилгааны самбар дээр тамхины сурталчилгаа хийхийг хориглох бөгөөд дэмжигчид ийм сурталчилгаа нь залуучуудыг тамхи татахыг уриалдаг гэж үзэж байна.
"Хүмүүс тамхи татах нь ичмээр, энэ нь нийгмийн муу үзэгдэл бөгөөд хэнд ч сайнаар нөлөөлдөггүй учир хориг тавих зөв гэж би үзэж байна" гэж Каруж хотын иргэн Анжела Маргеурон хэлэв.
"Хүмүүс тамхинаас болж эмнэлэгт хэвтэх, нас барах эсвэл эрүүл мэндийн асар том асуудалтай болж байгааг бид байнга сонсдог ч энэ зар сурталчилгаа үргэлжлэн цацагдсаар байгаа нь мэдээжийн хэрэг мөнгөтэй холбоотой."
Ням гарагт болсон өөр хоёр санал хураалтад Засгийн газар ялагдсан.
Үнэт цаасны хөрөнгө өсгөхөд ногдуулдаг 1 хувийн татварыг цуцлах саналыг 63 хувь нь эсэргүүцэж, ердөө 37 хувь нь дэмжсэн гэж Сангийн сайд Уэли Маурер хэлэхдээ, Швейцарьт хөрөнгө оруулах хүсэлтэй бизнес эрхлэгчдэд сөрөг дохио өглөө гэв.
Хэвлэл мэдээллийн хэрэгсэлд санхүүгийн дэмжлэг үзүүлэх Бернийн төлөвлөгөө мөн бүтэлгүйтсэн ба санал асуулгад оролцогсдын 55% нь татгалзсан байна.
Сангийн сайд Маурертай хамтран хийсэн хэвлэлийн бага хурал дээр Харилцаа холбооны сайд Симонетта Соммаруга хэлэхдээ "Олонхи нь хэвлэл мэдээллийн хэрэгсэлд хэтэрхий их мөнгө зарж байна гэж боддог бөгөөд олонхи нь энэ санал нь томоохон хэвлэн нийтлэгчдийг дэмжсэн байдаг гэдэг үндэслэлтэй санал нийлж байна. Сүүлийн хэдэн долоо хоногт буруу хүмүүс ашиг хүртэх болно гэсэн маргаан давамгайлах болсон" гэжээ
