/2021.11.15/: Эквадорын шоронд өнгөрсөн есдүгээр сард мөргөлдөөн гарч, зуу гаруй хоригдол амиа алдсан бол дахин 68 хоригдол амиа алдсан хэрэг гарчээ.
Гуаякил хотын хорих ангид баасан гарагийн орой бослого гарсан тухай мэдээлж байна.
Хорих ангийн барилга руу нэвтэрсэн цагдаагийн албан хаагчид тус шоронгоос буу, тэсрэх бодис, хурц иртэй зүйлс олжээ.
Энэ он гарсаар тус улсын шоронд 300 орчим хоригдол нас барсан байна.
Есдүгээр сард болсон гэмт бүлэглэлийн хүчирхийлэл Эквадорын түүхэн дэх хамгийн аймшигтай хэрэг байв.
Тухайн үед шоронгийн нэг жигүүрийн хоригдлууд өөр жигүүр рүү нэвтрэхийн тулд нүхээр мөлхөж, өрсөлдөгч бүлэглэлийн гишүүд рүү дайрчээ. Цогцолборын хяналтыг эргүүлэн авахын тулд олон зуун офицер, армийн цэргүүдийг илгээсэн байна.
Зарим хоригдлуудын толгойг нь тасалсан байсан ба үхлийн аюултай тэмцэл нь Мексикт төвтэй Синалоа, Жалискогийн шинэ үеийн үндэстэн дамнасан гэмт хэргийн бүлэглэлүүдийн Эквадор дахь нөлөө улам бүр нэмэгдэж байгаа нь анхаарлыг ихээр татах болов.
Гуаяс мужийн Гуаякил хотын шоронд болсон хамгийн сүүлийн мөргөлдөөний улмаас мөн 25 хүн шархадсан бөгөөд энэ сарын эхээр болсон жижиг зэвсэгт мөргөлдөөний дараа гурван хоригдолыг буудан хөнөөсөн байна.
Бямба гарагийн орой шоронд дахин хүчирхийлэл гарч байгаа тухай мэдээлсэн бөгөөд цэргүүд байгууламжийн гадна талыг бэхлэлтэнд авсан байна.
Эрх баригчид гэмт бүлэглэлийн толгойлогчийг хугацаанаас нь өмнө сулласны дараа хүчирхийлэл өрсөлдөгч бүлгүүдийн хоорондох газар нутгийн маргаанаас үүдэн эхэлсэн гэж мэдэгджээ.
Гуаяс мужийн амбан захирагч Пабло Аросемена сэтгүүлчдэд хэлэхдээ, "Шоронгийн энэ хэсэгт бүлэглэлийн толгойлогчгүй гэж байгаагүй тул бусад бүлэглэлүүд тухайн хэсэг рүү орохыг оролдсон" гэж Гуаяс мужийн захирагч хэлэв.
Түүний хэлснээр үхлийн аюултай үймээн болж буй тус байгууламжийн бүсэд 700 орчим хоригдол байгаа аж.
Ерөнхийлөгч Гильермо Лассо твиттер хуудсандаа хийсэн богино мэдэгдэлдээ "хайртай дотны хүмүүсээ алдсан ар гэрийнхэнд нь эмгэнэл илэрхийлээд" эмх замбараагүй байдлаас ашиг олдог мафитай тэмцэхийн тулд шинэ арга хэмжээ авах шаардлагатай гэж мэдэгджээ.
Ноён Лассо энэ сарын эхээр ВВС-д өгсөн ярилцлагадаа засгийн газар нь зөвхөн шоронгуудыг төдийгүй Эквадорын хар тамхины наймаачид байр сууриа бэхжүүлсэн бүс нутгуудад хяналтаа сэргээж байна гэж онцолжээ.
Тэрээр өмнөх засгийн газруудаа хар тамхины наймааны эсрэг "идэвхгүй" хандсан гэж буруутгасан ч тус улсад хар тамхины хэрэглээ нэмэгдэж байгаатай тэмцэхэд "арав гаруй жил" шаардлагатайг анхааруулав.
Мөн тэрээр Эквадорт гэмт хэргийн бүлэглэлийн нөлөө нэмэгдэж буйтай тэмцэхийн тулд зэвсэгт хүчин, цагдаагын хүчинг бэхжүүлэхийн тулд хөрш Колумби, АНУ, ЕХ-ны олон улсын дэмжлэг хэрэгтэй болно гэж тэр хэлэв.
Эквадорын шоронгууд одоогоор төлөвлөснөөс илүү буюу 9000 гаруй хоригдолтой байна гэж албаны хүмүүс мэдэгдэв. Литорал хорих анги нь 5300 хоригдол хүлээн авах хүчин чадалтай ч одоогоор 8500 хоригдолтой байгаа гэнэ.
Эх сурвалж: bbc.com
