/2021.11.10/: Польшийн Ерөнхий сайд Матеуш Моравецки Польш-Беларусийн хил дээрх цагаачдын хямралд Орос оролцож байгааг зарласан тухай ТАСС мэдээллээ.
Түүний бодлоор Польш-Беларусийн хил дээр болж буй үйл явдал нь Беларусийн Ерөнхийлөгч Александр Лукашенкогийн үйлдлийг "хянаж" байгаа Оросын бодлогын нэг хэсэг гэнэ.
Беларусь улсын Европын холбоотой хиллэдэг газарт цагаачдын тоо нэмэгдэж байгаа нь Беларусийн эрх баригчдын үйл ажиллагааны үр дүн гэж Моравецкий хэлэв. "Беларусийн эрх баригчид олон мянган цагаачдыг зориудаар тухайн бус нутаг руу нь татан авчирж, Европын холбооны хил рүү бөөнөөр нь гаргахад хүргэсэн" гэж тэр хэлэв. Польшийн Ерөнхий сайд "Лукашенко тэднийг эх орондоо буцах боломжийг нь бүрдүүлэх, хариуцлага хүлээх үүрэгтэй" гэж онцолжээ.
Беларусь нутгаар дамжин өнгөрөх хууль бус цагаачдын урсгалын эсрэг өнөөдөр Польшийн хийж байгаа үйлдлүүд нь шантаажтай адил байна гэж Лукашенко өмнө нь хэлсэн.
Есдүгээр сарын 2-нд Польш улс Беларусьтай хиллэдэг хоёр бүс нутагт нэг сарын хугацаатай онц байдал тогтоосон. Польшийн Ерөнхийлөгчийн хэвлэлийн алба "БНБУ-ын хил дээр үүсээд байгаа нөхцөл байдалтай холбоотой иргэдийн аюулгүй байдал, нийгмийн хэв журамд онцгой аюул заналхийлж байгаатай холбогдуулан энэ арга хэмжээг хэрэгжүүлсэн" гэж тайлбарлав. Арваннэгдүгээр сарын 8-нд Беларусь, Польшийн хил дээр Польшийн талаас буудах чимээ сонсогдсон гэж Беларусь мэдэгдэв.
Беларусь болон Европын Холбооны хилийг давж, эхлээд Литва, дараа нь Латви, Польш, Эстони улсуудаар дамжин өнгөрөх цагаачдын урсгал энэ оны зургадугаар сараас нэмэгдэж эхэлсэн.
ЕХ-ны гишүүн орнуудын эрх баригчид улс төрийн харилцаа ноцтой муудаж, Брюсселийн хориг арга хэмжээний шахалтаас үүдэн Минскийг Ирак, Афганистан зэрэг орноос хууль бус цагаачдыг Беларусийн Белавиа компанийн онгоцоор дамжин өнгөрүүлэх ажлыг зохион байгуулсан гэж буруутгажээ. Беларусийн Ерөнхийлөгч Александр Лукашенко Польш, Литвийн хилийн албаныхныг цагаачдыг албадан хөөж байна гэж буруутгаж, хориг арга хэмжээний улмаас ЕХ руу шилжин орж ирэхийг зогсоосон хариуцлагаа эргүүлэн татлаа гэж мэдэгдэв
Эх сурвалж: vedomosti.ru
