/2021.10.15/ Тайванийн өмнөд хэсгийн нутагт байрлах барилгад пүрэв гаригт гал гарч, 46 хүн амиа алдсан талаар албаны хүмүүс мэдээллээ.

Тайванийн албан ёсны төв мэдээллийн агентлагийн (CNA) мэдээлснээр, түймэр орон нутгийн цагаар шөнийн 02:54 цагт Каохсиун хотын Янчен дүүрэгт орших худалдаа, орон сууцны барилгын 13 давхарт гарсан байна.

Барилгын эхний зургаан давхрыг худалдаа үйлчилгээний зориулалтаар, долоодугаар давхраас дээш орон сууцны зориулалтаар ашигладаг байсан байна.

Тайванийн Ерөнхийлөгч Цай Ин Вэнь галын улмаас амиа алдсан иргэдэд гүн эмгэнэл илэрхийлж, хохирогчдын ар гэрийнхэнд шаардлагатай тусламж үзүүлэхэд бүх хүчин чадлаа дайчлан ажиллах болно хэмээн мэдэгдсэн байна.

Аврах ажиллагаа үргэлжилж байгаа бөгөөд ослын газарт 370 гаруй аврагч ажиллаж байна гэж тус хотын гал түймрийн товчооны хэвлэлийн төлөөлөгч CNN агентлагт мэдээлжээ. Ослын газарт нийт 139 гал унтраах болон түргэн тусламжийн машиныг дайчилж баасан гарагийн өглөөний 7:17 цагт галыг унтраажээ.

Гал юунаас болж гарсан нь одоог хүртэл тодорхойгүй байгаа бөгөөд орон нутгийн цагдаа нар галын шалтгааныг тодруулахаар хяналтын камеруудыг шалгаж байна гэж албаны хүн мэдээлсэн байна.

Эх сурвалж: CNN