/2021.10.14/: Орон нутгийн цагдаагийн газрын мэдээлснээр Норвегийн Конгсберг хотод болсон халдлагын үеэр таван хүн амиа алдаж, хоёр хүн шархаджээ.

Халдлага үйлдсэн байж болзошгүй этгээд нум сум ашигласан гэж Норвегийн Конгсберг хотын зүүн өмнөд хэсгийн цагдаагийн дүүргийн хэвлэлийн төлөөлөгч Лхагва гарагт CNN агентлагт ярьжээ.

Сэжигтнийг баривчилсан бөгөөд ганцаараа уг хэргийг үйлдсэн гэж үзэж байна. Түүнээс хараахан байцаалт аваагүй байгаа гэж Драммен мужийн цагдаагийн газрын дарга Øyvind Aas хэлэв.

Халдлагын дараа хэвлэлийнхэнд мэдээлэл өгөхдөө цагдаагийн дарга, эрх баригчид террорист халдлага байсныг үгүйсгээгүй ба “Үйл явдлын явцаас харахад энэ нь террорист үйлдэл мөн эсэхийг авч үзэх нь зүйн хэрэг юм” гэж хэлжээ. Гэсэн хэдий ч "баривчлагдсан хүнээс байцаалт хараахан аваагүй байгаа тул энэ талаар ямар нэгэн зүйл хэлэхэд эрт байна" гэжээ.

Тус улсын нийслэл Осло хотод болсон хэвлэлийн бага хурал дээр Ерөнхий сайдын үүрэгт ажлаасаа чөлөөлөгдөж буй Эрна Солберг Конгсбергт болж буй үйл явдлыг "аймшигтай" гэж тодорхойлж, "шаардлагатай бүх нөөц бололцоог" дайчлах болно гэж амлав.

"Гэмт хэрэгтэн хэд хэдэн хүний аминд хүрсэн. Энэ бол Конгсбергт хүндээр туссан маш эмгэнэлтэй бөгөөд бид бүгдийг цочроосон хэрэг боллоо" гэж тэр хэлэв.

Энэхүү халдлага нь олон жил эрх барьж байсан Консерватив нам өнгөрсөн сард болсон парламентын сонгуульд ялагдан, Норвеги улсын шинэ засгийн газар байгуулагдахын өмнөхөн боллоо. Хөдөлмөрийн намын удирдагч Жонас Гар Сторе пүрэв гарагт Ерөнхий сайдын үүрэгт ажлаа хүлээж авах гэж байна.

Сторе фэйсбүүк хуудсандаа энэ халдлагыг "харгис хэрцгий үйлдэл" гэж тодорхойлжээ.

"Тэрээр хохирогчдын ар гэрт гүн эмгэнэл илэрхийлээд цагдаа, эрүүл мэндийн ажилтнууд, тусламжийн ажилтнууд тусламж хэрэгтэй байгаа хүмүүст яаралтай тусламж үзүүлж байна” гэжээ.

Аас-ын хэлснээр шархадсан хүмүүсийн нэг нь дэлгүүрт байсан жижүүрийн цагдаа юм.

"Гэмтсэн хүмүүсийг эмнэлэгт хүргэж, эмчилгээ хийлгэж байна. Конгсберг хотын захиргаанд мэдэгдэж, тусламж хэрэгтэй байгаа хүмүүст туслах, хяналт тавих зорилгоор хямралын үед ажиллах багуудыг байгууллаа" гэж тэр хэлэв.

Конгсберг нь Осло хотоос баруун зүгт 85 километрийн зайд оршдог.

Одоо тус улсын цагдаа нар түр зэвсэглэсэн байгаа бөгөөд цагдаа нар орон нутгийн цагаар 18:13 цагт Конгсберг хотын төвөөс яаралтай дуудлага хүлээн авч эхэлсэн гэж зүүн өмнөд хэсгийн цагдаагийн газраас мэдэгджээ.

Дуудлагад нэг хүн "нум сум шиг зүйл" -тэй явж байсан тухай мэдээлжээ. Баривчлах үеэр цагдаа нар буудсан гэж Аас хэлэв.

Урьдчилан сэргийлэх зорилгоор галт зэвсэг авч явах тун ховор тушаалыг улс даяар цагдаа нарт өгчээ.

Норвегийн хуулийн дагуу офицерууд галт зэвсэг авч явахын тулд урьдчилан зөвшөөрөл авсан байх ёстой.

Энэхүү халдлага нь Норвегийн хамгийн аймшигт террорист халдлагаас хойш арав гаруй жилийн дараа болж буй хэрэг юм.

2011 оны долдугаар сард Норвегийн хэт барууны хэт даврагч Андерс Беринг Бревик бөмбөг дэлбэлсний улмаас 77 хүн амиа алдсаны ихэнх нь өсвөр насныхан байв. Түүнд 21 жилийн хорих ял оноосон бөгөөд энэ нь байж болох хамгийн дээд хугацаа ажээ.

2019 оны наймдугаар сард бас нэг хүн буутай зэвсэглэсэн Осло хотын сүм рүү дайран орсон юм. Тэр жил тус улсын тагнуулын алба дэлхий дахинд баруун жигүүрийн терроризм нэмэгдэж байгааг мэдээлж, ойрын ирээдүйд тус улсыг онилох магадлалтайг анхааруулж байжээ.

Эх сурвалж: cnn.com