/2021.10.08/ Эрүүл мэндийн яамнаас цаг үеийн асуудлаар мэдээлэл хийж байна.

ЭМЯ-ны хэвлэлийн төлөөлөгч Б.Ууганбаяр, "Нийт халдварын тохиолдлын 90 хувь нь дельта хувилбар байна. Энэ нь хүнтэй зөрөх төдийд л халдварлах маш өндөр чадвартай. Гэтэл иргэд "тэгж байгаад хийлгэнэ дээ" гээд тайвширчихсан явж байна. Гуравдугаар тун хийлгэсэн иргэдийн дунд өвчлөл бага байгаа. Нэмэлт тун хийлгэсэн иргэдийн 99 хувь нь халдвараас хамгаалагдаж байна. Бүрэн тунтай байж байгаад халдвар авсан хүмүүс гурав дахь тунг хийлгэх шаардлагагүй" гэв.

ХӨСҮТ-ийн захирал Ц.Билэгтсайхан, "Эрсдэл бүхий бүлэг өндөр настай, архаг хууч өвчтэй иргэд болон хил гааль, цэргийн ангийн ажилтнуудаа III тунд идэвхтэй хамруулах болно. Монгол Улс дөрвөн төрлийн вакциныг сайн дурын үндсэн дээр хийж байгаа ба дархлаа өрнүүлэх чадамж хангалттай хэмжээнд үүсэж байна. Вероселл, Файзер вакцинаас дархлаа сэдээх гурав дахь тунг хийж байна" гэлээ.

Мөн тэрбээр дельта хувилбарын давлагаа оргил үедээ хүрсэн. Цаашдаа тархалтын тоо буурах хандлагатай байна гэв.