/2023.04.06/: Хөх хотод консулаар ажиллаж байсан Д.Мөнх-Эрдэнэд холбогдох шүүх хурал өнөөдөр Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхэд гурав дахь өдрөө үргэлжлэн шийдвэрээ гаргалаа.

Шүүгдэгч Д.Мөнх-Эрдэнийг:

• Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, их хэмжээний хохирол учруулсан гэмт хэрэг үйлдсэн гэм буруутайд,
• Өөртөө болон бусдад давуу байдал бий болгох зорилгооор бүлэглэж хахууль өгөх гэмт хэрэг,
• Хууль сахиулагчийг албан үүргээ биелүүлэхтэй холбогдуулан хүч хэрэглэхээр заналхийлж эсэргүүцсэн гэмт хэрэг,
• Хүний нэр хүнд, алдар хүнд, ажил хэргийн нэр хүндэд халдсан худал мэдээлэл тараасан зэрэгт буруутгалаа.

Шүүхээс түүнд 3 жил 10 сарын хорих ял оноож, нийтийн албанд ажиллах эрхийг нь таван жилээр хасч, 112 гаруй сая төгрөгийн хохирол учруулсан гэж үзэн түүнээс 82,263,785 төгрөгийг гаргуулж, улсын төсөвт олгохоор болжээ.