/2022.11.28/ Хятадын олон хотод "Ковидгүй байх" Коммунист нам, Ши Жиньпиний бодлогыг эсэргүүцсэн олон мянган хүний жагсаал болж байна.
Энэ жагсаал өнгөрөгч бямба гарагт эхэлсэн юм. Шиньжан Уйгарын нийслэл Өрөмч хотод гарсан гал түймрийг унтраахаар очсон галын машинууд орон сууцны гадуурх хаалтыг давж чадалгүй гацаж, улмаар гал түймрийн улмаас 10 хүн амиа алдаж, цөөнгүй хүн шархадсантай холбоотой. Мөн BBC-д өгсөн зарим эх сурвалж "Гал гарч байсан ч оршин суугчдыг гадагш гарахыг зөвшөөрөөгүй" гэх мэдээлэл байгаа юм.
Үүний улмаас уурссан оршин суугчид хаалтыг үл тоон гудманд гаран жагсаж эхэлжээ. Жагсагчид "Ши Жиньпин огцор, Коммунист нам огцор" хэмээн дуу хоолойгоо нэгтгэж байгааг The Guardian-ий дараах видеоноос харж болно.
Дээрх видео нь Шанхайн төв хэсэгт жагсаж буй олныг харуулж байна. Мөн их дээд сургуулиудын гадаа оюутнууд жагсаж эхэлжээ. Үүнийг 1989 онд болсон Тянь ан Мэн талбайд болсон жагсаалаас хойш болж буй анхны томоохон жагсаалтай зүйрлэж байна.
Protest on Tsinghua campus. This is very rare after 1989. pic.twitter.com/4Yzt0YgG7m
— Yang Zhang (@ProfYangZhang) November 27, 2022
Хятадын иргэд зөвхөн эх орондоо төдийгүй Парис, Амстердам, Дублин, Торонто зэрэг хотуудад жагсаал хийж байна.
BBC "Энэ гудамжинд амралтын өдрүүдэд олон мянган хүн жагсаж байсан. Харин даваа гарагийн өглөө энд юу ч болоогүй мэт нам гүм байна" хэмээн дараах зургийг нийтэлжээ.
Ройтерс агентлагийн мэдээлж буйгаар ням гарагийн орой Шанхайн гудамжуудаар олон мянган хүн жагсаж, тэд цагаан цаасан дээр өөрсдийн эсэргүүцлийн үгсээ бичсэн байжээ.
"Би эх орондоо хайртай учир энд байна. Гэхдээ би Засгийн газартаа үнэхээр дургүй хүрч байна. Бид чөлөөтэй баймаар байна. Манай Засгийн газрын барьж байгаа бодлого ямар ч шинжлэх ухааны үндэслэлгүй, ямар ч бодит байдалд нийцээгүй, яг тоглоом аятай" хэмээн Шаон Шиао гэх иргэн Ройтерсын сурвалжлагчид ярьжээ.
Эх сурвалж: BBC, CNN, Reuters, Al Jazeera