/2022.10.25/: “Улаанбаатар төмөр зам” ХНН нь төмөр замаар тээвэрлэх ачаа тээврийн захиалгыг ил тод, нээлттэй, хөнгөн шуурхай, хүний оролцоо хамааралгүй болгох үүднээс экспортын тээврийн захиалга болон ачилтын дарааллыг бүрэн цахим системд шилжүүлээд байна.

Энэхүү ажлын хүрээнд 2022 оны 11 дүгээр сарын 01-ний өдрөөс 2022 оны 11 дүгээр сарын 15-ны өдөр хүртэл 12 дугаар сарын экспортын ачилтын захиалгыг цахимаар авах бөгөөд ингэхдээ зөвхөн вагон эзэмшигч нартай гэрээ байгуулж захиалгыг авна.

“Улаанбаатар төмөр зам” ХНН нь вагон олголт, хуваарилалтад хөндлөнгөөс оролцохгүй бөгөөд өөрийн эзэмшлийн вагонгүй иргэд, аж ахуйн нэгжүүд нь экспортын ачилт хийлгэх тохиолдолд хувийн вагон эзэмшигч нарт хандах юм.

УБТЗ-ын өөрийн эзэмшлийн вагонууд нь дулааны цахилгаан станцуудын нүүрс, Эрдэнэтийн зэсийн баяжмал зэрэг улсын онц чухал ачаа тээврийн үүрэг гүйцэтгэдэг тул хувийн хэвшлийн экспортын тээвэрт хүрэлцдэггүй юм.