/2024.03.23/: Баасан гарагт Москвагийн алдартай концертын цогцолбор луу халдлага үйлдэгчид буу, шатаах төхөөрөмтэй дайран орж, 60 хүний аминд хүрч, 145 хүнийг шархдуулсан бөгөөд уг халдлагын хариуцлагыг ISIS өөртөө хүлээлээ.
Террорист бүлэглэл халдлага үйлдсэний хариуцлагыг өөртөө хүлээсэн бөгөөд ISIS-тай холбоотой Amaq мэдээллийн агентлаг баасан гарагт Telegram дээр нийтэлсэн богино мэдэгдэлдээ энэ тухай дурджээ.
Крокус Сити Холлоос авсан видео бичлэгт хөгжмийн танхим, худалдааны төв хоёулаа байрладаг асар том цогцолбор галд шатаж, утаа униар шуугиж байгааг харуулсан байна. Төрийн мэдлийн РИА Новости агентлагийн мэдээлснээр зэвсэгт этгээдүүд "автомат буугаар гал нээж, гранат юм уу шатдаг бөмбөг шидсэний улмаас гал гарсан" гэжээ. Дараа нь тэд "цагаан өнгийн Renault машинаар зугтсан" гэж мэдээллийн агентлаг мэдээлэв.
Төрийн мэдээллийн "Россия 24"-ийн мэдээлснээр, талбайн дээвэр хэсэгчлэн нурсан байна.
Гал сөнөөгчид зургаан цаг гаруйн дараа галыг бүрэн хяналтандаа авчээ.
Баасан гарагт болсон халдлага нь Москвад сүүлийн хэдэн арван жилд тохиолдсон хамгийн олон хүний аминд хүрсэн террорист халдлага болж байна.
"Picnic" хамтлагийн тоглолтын өмнө аллага болсон гэж "Россия 24" мэдээлэв. Тус хамтлагийн менежер жүжигчид ямар ч гэмтэл аваагүй гэж төрийн хэвлэлд мэдэгджээ.
"Крокус Сити Холл-д өнгөлөн далдалсан үл таних хүмүүс нэвтэрч, тоглолт эхлэхээс өмнө буудаж эхэлсэн" гэж Ерөнхий прокурорын газраас ТАСС мэдээлэв.
Эх сурвалж: CNN
