/2024.03.22/: Украины Ерөнхийлөгч Володимир Зеленский агаарын довтолгооноос хамгаалах систем нийлүүлэхийг барууны орнуудад яаралтай уриалсны дараа Оросын пуужин Украины Харьков хот руу онилж, хотын эрчим хүчний хангамжийн нэг хэсгийг тасалжээ.
Харьков хотын дарга Ихор Терехов баасан гарагийн өглөө, "15 удаагийн дэлбэрэлтийн чимээ сонсогдсоны дараа хэсэгчлэн цахилгаан тасарч, хотын усны насос унтарсан байна. Одоогоор амиа алдагсдын талаар мэдээлэл ирээгүй байна.
Харьков нь Украины зүүн хойд хэсэгт ОХУ-тай хиллэдэг хилээс ердөө 30 км-ийн зайд оршдог бөгөөд 2022 оны хоёрдугаар сард Москва тус улс руу бүрэн хэмжээний халдлага үйлдэж эхэлснээс хойш байнга бөмбөгдөлтөд өртөж байгаа юм.
Украины албаныхны мэдээлснээр Оросын пуужин Зеленскийн төрөлх хот болох Кривой Рог болон Украины төв хэсэгт орших Винница хотыг тус тус онилж, тус хотын нэн чухал дэд бүтцийийг гэмтээсэн байна.
Баасан гарагт хийсэн ОХУ-ын дайралт Украины хамгийн том далан болох тус улсын өмнөд хэсэгт орших Запорожжиа дахь ДнепроГЭС-д цохилт өгсөн боловч сэтрэх эрсдэл байхгүй гэж мэдэгдэв.
“Одоогоор станцад гал гарч байна. Онцгой байдлын алба, эрчим хүчний ажилчид олон тооны агаарын цохилтын үр дагаврыг арилгахаар газар дээр нь ажиллаж байна" гэж тус үйлчилгээний газраас мэдээллээ.
Запорожье хотын захиргаа тус хотод найман удаа пуужингийн дайралт хийсэн тухай мэдээлсэн бөгөөд зарим оршин суугчид шархадсан гэж мэдэгджээ.
Энэхүү халдлагууд нь өмнөх өдөр Оросын Киевт өгсөн цохилтын араас ойр ойрхон гарч байгаа нь ОХУ-ын Ерөнхийлөгч Владимир Путин ОХУ-ын хилийн бүс нутгуудад цохилт өгч, дайрсны хариуг авна гэж амласнаас болж байх магадлалтай юм.
Эх сурвалж: Aljazeera
