/2022.05.25/: АНУ-ын тагнуулын мэдээлснээр Орос Украин руу довтолсноор Украины боомтуудын далайн худалдааг зогсоож, үр тарианы экспортыг хааж, дэлхийн хүнсний хямралыг эрсдэлд оруулж байна гэв.
Хүнсний экспорт хаагдсан: Орос Хар тэнгист "бүслэлт" тогтоосон гэж АНУ-ын албаны хүн мэдэгдэв. Украйн улс дэлхийн улаан буудайн экспортын 10 орчим хувийг хангадаг бөгөөд үүний дийлэнх нь Хар тэнгисийн боомтуудаас гардаг гэж албаны хүн тэмдэглэв. НҮБ-ын Дэлхийн хүнсний хөтөлбөрийн тэргүүн ОХУ-ын Ерөнхийлөгч Владимир Путинд хандан дэлхийн өнцөг булан бүрт байгаа хүүхдүүдийг өлсгөлөнд нэрвэгдэхээс сэргийлэхийн тулд Украин дахь боомтуудыг дахин нээхийг уриалжээ.
Мариупольд амь үрэгдэгсдийн тоо: Мариуполь руу гурван сар үргэлжилсэн Оросын дайралтаас болж дор хаяж 22,000 оршин суугч амиа алдсан гэж Украины боомт хотын албаны хүн мэдэгдэв. Петр Андрущенко хэлэхдээ, энэ тоог нэгтгэхийн тулд хэд хэдэн эх сурвалжуудын дүн мэдээг нэгтгэсэн бөгөөд бодит тоо илүү их байж магадгүй гэж үзэж байна.
Украины цэргүүд маргаантай хотоос гарчээ: Оросын цэргүүд зүүн Донбассын бүс нутгийн Свитлодарск хотыг эзлэн авч, Украины цэргүүд ухран гарсан гэж Донецк мужийн цэргийн захиргааны дарга Павло Кириленко мягмар гарагт мэдэгдэв. Эзлэгдсэн Свитлодарск хотод 10 мянга орчим энгийн иргэн үлдсэн гэж Кириленко мэдэгдэв. Энэ нь Украины армийн "ухарсан" хэрэг биш, харин "хүчээ дахин нэгтгэх төлөвлөгөө" бөгөөд илүү олон хүний амь аврах "зөв бөгөөд логик шийдвэр" гэж нэмж хэлэв.
Украины тусгай хүчин нисгэгчгүй онгоцны бичлэгийг үзүүлэв: Украины тусгай хүчнийхэн гадаадад үйлдвэрлэсэн жижиг оврын нисгэгчгүй онгоцуудыг ашиглан Оросын цэргийн байрлалыг онилж байгаа дүрс бичлэгийг анх удаа олон нийтэд дэлгэлээ. Камикадзе гэгддэг зөөврийн нисгэгчгүй онгоцууд нь байлдааны хошуутай бөгөөд цохилт өгөх үед дэлбэрдэг аж.
Европ сэрэмжтэй байна: Украины дайны улмаас Унгар улс "онц байдал" зарлана гэж Унгарын Ерөнхий сайд Виктор Орбан мягмар гарагт мэдэгдэв. "Унгар улс энэ дайнд оролцохгүй байж, гэр бүлийнхээ санхүүгийн аюулгүй байдлыг хамгаалах ёстой. Үүнийг хийхийн тулд бидэнд маневр хийх орон зай, яаралтай арга хэмжээ авах чадвар хэрэгтэй" гэж тэр хэлэв. Энэ үеэр Польшийн Гадаад хэргийн сайд Украинд гал зогсоосон ч Орос Европ дахь энх тайванд заналхийлсээр байх болно гэж мэдэгдэв.
Эх сурвалж: CNN
