/2022.04.15/: Apple-ийн iPhone гар утасны томоохон үйлдвэр Шанхай хотын хөл хорионд байгаагийн улмаас үйл ажиллагаагаа зогсоохоор болжээ.
Технологийн компани болох Pegatron Хятад дахь хоёр үйлдвэрийнхээ үйлдвэрлэлийг түр зогсоолоо гэж мэдэгдлээ.
Мягмар гарагт эрх баригчид Шанхай хотын коронавирусын эсрэг зарим зохицуулалтыг хөнгөвчлөхтэй зэрэгцэн энэхүү мэдэгдэл гарчээ.
Энэхүү мэдэгдэлд хотын 25 сая хүн амын зарим нь хэдэн долоо хоногийн дараа анх удаа гэр орноо орхин гарах боломжтой болж байгаа тухай байсан юм.
Хөрөнгийн биржийн мэдүүлэгт Пегатрон "орон нутгийн засаг захиргаанаас Ковид-19-ээс урьдчилан сэргийлэх шаардлагын дагуу" Шанхай болон ойролцоох Куншан дахь үйлдвэрүүдийнхээ үйл ажиллагааг зогсоосон гэж мэдэгджээ.
Тус компани "үйл ажиллагаагаа аль болох хурдан сэргээхийн тулд эрх баригчидтай хамтран ажиллана" гэж мэдэгдэв.
Apple-ийн томоохон MacBook үйлдвэрлэгч Quanta болон iPad үйлдвэрлэгч Compal Electronics нар Хятадын хотуудад үйл ажиллагаагаа түр зогсоосон гэж Японы Nikkei сонин мэдээлэв.
Хөрөнгө оруулалтын Wedbush Securities фирмийн шинжээч Дэн Айвс энэхүү зогсолт нь үйлдвэрлэлд сөргөөр нөлөөлнө гэж бодож байгаагаа хэлсэн байна.
Түүний тооцоолсноор энэ сарын байдлаар 3 сая iPhone үйлдвэрлэх боломжоо алдсан бөгөөд хэрэв энэ хэвээр байвал илүү олон гар утас үйлдвэрлэх боломжоо алдсаар байх болно гэжээ.
Ноён Айвс мөн ВВС-д өгсөн ярилцлагадаа 2 сая iPad, 1 сая MacBook-ийн үйлдвэрлэлд мөн нөлөөлж магадгүй гэж мэдэгджээ.
"Pegatron-ын үйлдвэрүүдээ хаах шийдвэр нь Apple болон iPhone-ийн экосистемийн бусад хэсгүүдийн нийлүүлэлтийн сүлжээг зогсоож гал дээр бензин цацаж байна" гэж тэр хэлэв. "Ингэснээр iPhone-уудын нийлүүлэлтийн сүлжээний асуудлыг улам бүр нэмэгдүүлж байна" гэлээ.
Apple-д зориулж iPhone утас угсардаг Тайваний өөр нэг компани Foxconn өнгөрсөн сард Шэньжэнь дэх үйлдвэрийнхээ үйл ажиллагааг зогсоосон.
Царт тахал 2019 онд эхэлснээс хойш Хятад улс Сиань, Ухань зэрэг томоохон хотуудын сая сая хүмүүст нөлөөлж үйл ажиллагааг нь зогсоож байсан бол Шанхай хотын хөл хорио нь өнөөг хүртэлх хамгийн томд тооцогдож байгаа бөгөөд тус хот нь санхүүгийн салбар, үйлдвэрлэл болон дэлхийн хамгийн том боомт байрладаг гол төв юм.
Эх сурвалж: CNN
