/2022.01.27/: Монгол Улсын Их Хурлын гишүүн Ц.Мөнх-Оргил Төрийн албаны зөвлөлийн “7:4:10” вебинар сургалтад урилгаар оролцож, хүн төрөлхтний амьдралд томоохон, эргэлт буцалтгүй өөрчлөлт авчирч буй орчин үеийн хөгжлийн мегатрендүүд (гол хандлагууд)-ийн талаар танин мэдэхүйн өндөр ач холбогдолтой, өргөн хүрээний мэдээллийг төрийн албан хаагчдад хүргэлээ.
Дэлхий нийтэд эрчимтэй өрнөж буй хөгжлийн гол чиг хандлагуудыг Технологийн хувьсгал; Уур амьсгалын өөрчлөлт; Байгалийн нөөцийн хомсдол; Хотжилт; Дундаж давхаргын өсөлт; Нийгмийн өөрчлөлтийн хүрээнд төрөлжүүлэн бодит жишээ баримт, статистик тоон үзүүлэлтэд тулгуурлан сонирхолтой байдлаар танилцуулав.
Орчин үеийн хөгжлийн мегатрендүүдийг судлан төрийн бодлого, үйл ажиллагаанд тусган хэрэгжүүлж, тэдгээрийн үр өгөөжийг нийгэмд хүртээхийн чухлыг онцолсон юм.
Мөн түүнчлэн геополитикийн өнөөгийн төлөв байдлыг АНУ-ын улс төрийн дотоодын туйлшрал; БНХАУ-ын өсөлт; Байр сууриа бэхжүүлэх ОХУ-ын бодлого; Европ дахь өөрчлөлтүүд; Лалын ертөнц дэх онцлогын жишээн дээр тайлбарлалаа.
Энэ удаагийн “7:4:10” вебинар сургалтад Төрийн албаны зөвлөлийн дарга, гишүүд, Ажлын албаны албан хаагчид, Улсын Их Хурлаас удирдлага нь томилогддог байгууллагууд, яам, агентлаг, 21 аймаг, нийслэл, 330 сум, 9 дүүргийн төрийн албан хаагчид 1700 гаруй техник хэрэгслээр байгууллага хамт олноороо оролцлоо.
Эх сурвалж: ТАЗ
