/2022.01.14/ Хүүхдийн мөнгө бэлнээр авах хүсэлтээ И-Баримт аппликейшн, И-Халамж системээр явуулдаг болсон.

Сар болгон ийм хүсэлт явуулах нь хүндрэлтэй байх магадлалтай тул илүү хялбар арга бий болгох үүргийг Ерөнхий сайд Л.Оюун-Эрдэнэ Засгийн газрын өчигдрийн хуралдаанаар үүрэг болгон өгсөн юм. Улмаар Гааль, Татвар, Санхүүгийн мэдээллийн технологийн төвийн мэргэжилтнүүд нэмэлт хөгжүүлэлт хийж, нэг дор бүх сарыг идэвхжүүлэх боломжтой болгожээ.

Та нэгдүгээр сарыг идэвхжүүлсэн байсан ч дахин орж бусад саруудыг идэвхжүүлэх хэрэгтэй юм.

Энэ оны долоодугаар сарын 1-н хүртэл 100 мянган төгрөг, түүнээс хойш буюу дараагийн хагас жилд 50 мянгыг нь хуримтлуулж, 50 мянган төгрөгийг авах сонголттой болох юм.

Хөдөлмөр, нийгмийн хамгааллын сайд А.Ариунзаяа "Одоогийн байдлаар 600 мянга орчим хүүхдийн хүсэлт бүртгэгдсэн. 100 орчим мянга нь манай халамжийн хэлтсүүдээр биечлэн болон утсаар, 500 мянган хүүхдийн хүсэлт цахимаар холбогдсон" гэв.