/2021.10.21/: Лхагва гарагт Европын парламент хоригдож буй Оросын сөрөг хүчний удирдагч Алексей Навальныйд Европын холбооны хүний эрхийн дээд шагналыг олгосноо зарлалаа.
"Тэр Владимир Путины дэглэм, авлигын эсрэг уйгагүй тэмцсэн. Энэ нь түүний эрх чөлөөгөө алдахад (бараг л амь насаа алдахад) хүргэсэн. Өнөөдрийн шагнал нь түүний асар их эр зоригийг үнэлж өгч байгаа ба бид түүнийг нэн даруй суллахыг уриалж байна" гэж твиттер хуудсандаа бичжээ.
Навальный 12-р сарын 15-нд Страсбург хотод болох шагнал гардуулах ёслолын үеэр Сахаровын үзэл бодлын эрх чөлөөний шагналыг авахаар аялах боломжгүй юм.
Зөвлөлтийн тэрс үзэлтний нэрэмжит шагналыг Европын парламент жил бүр олгодог. 1988 оноос хойш 50,000 еврогийн (58,156 доллар) шагналыг хүний эрх, эрх чөлөөг сурталчлах, хамгаалах чиглэлээр ажилласан хувь хүмүүс болон эрхийн байгууллагуудад олгодог болсон.
Түүнчлэн энэ жилийн шагналд нэр дэвшигчдийн дунд Их Британид төвтэй Global Witness хүрээлэн, Боливийн Ерөнхийлөгч асан Жанин Анез, Сахрауигийн идэвхтэн Султана Хаяа, Афганистаны 11 эмэгтэй багтжээ.
Парламентын Eвропын Ардын Намын /EPP/ Христийн ардчилсан бүлэг твиттер хуудсандаа лхагва гаригт "Ноён Путин, Алексей Навальныйг сулал. Европ түүний болон бусад бүх улс төрийн хоригдлуудын эрх чөлөөг шаардаж байна" хэмээн жиргэжээ
"Навальный бол Сахаровын шагналыг хүртэх ёстой энэ гараг дээрх цорын ганц хүн юм. Тэрээр үг хэлэх эрх чөлөө, ардчилал, ил тод байдал, авлигын эсрэг хэдэн арван жилийн турш тэмцэж, өөрөө асар их үнийг төлсөн. Шоронд хоригдсон, торгууль төлсөн, түүний байгууллагыг нураасан. Түүнийг хордуулсан" гэж Европын хууль тогтоогч, EPP -ийн гишүүн Петер ван Дален DW-д өгсөн ярилцлагадаа хэлжээ.
"Энэ бол Навальныйг дэмжихийн тулд Европоос өгч чадах хамгийн хүчтэй дохио юм. Бид Оросын сөрөг хүчинд итгэл найдвар өгч байна. Бид чамайг сонсож байна. Бид чамайг мартаагүй " гээд энэхүү найдварын захиасыг бид одоо Навальный болон Оросын сөрөг хүчин рүү илгээж байна " гэж тэр нэмж хэлэв.
Нэгдүгээр сард Навальный Германаас Орос руу буцаж очоод саатуулагдсан юм. 45 настай тэрс үзэлтэн тэнсэн суллах ялыг зөрчсөний улмаас 2.5 жилийн ял авч, хорих ангид ял эдэлж байгаа нь улс төрийн зорилготой гэж Навальный мэдэгдэж байжээ.
Навальный Москвад буцаж ирэхийнхээ өмнө 2020 оны наймдугаар сард Сибирьт цэргийн мэдрэлийн бодисонд хордсоныхоо дараа Герман улсад таван сар эмчлүүлж байжээ. Орос улс энэ хэрэг дэх өөрийн оролцоог үгүйсгэж, Өрнөдийн орнуудыг Оросын эсрэг гүтгэлгийн кампанит ажил өрнүүлж байна гэж буруутгаж байна.
Москвагийн шүүх өнгөрсөн зургадугаар сард Навальныйгийн авлигатай тэмцэх сан болон түүний бүс нутгийн оффисуудын сүлжээг хэт даврагч бүлэг гэж нэрлэн Навальныйгийн холбоотнуудыг яллах шийдвэр гаргасан юм.
Өнгөрсөн сард ОХУ-д томоохон гэмт хэргүүдийг шалгадаг Оросын Мөрдөн байцаах хороо Навальный руу чиглэсэн дахин нэг мөрдөн байцаалтын ажиллагаа эхлүүлсэн. Тус хороо 2014 он гэхэд Навальный "Оросын Холбооны Улсын үндсэн хуулийн тогтолцооны үндсийг өөрчлөх зорилгоор "хэт даврагч сүлжээг бий болгосон" гэж мэдэгджээ.
Гэсэн ч Навальныйгийн холбоотнууд Кремлийг шүүмжилсээр байна. Өнгөрсөн сард болсон ОХУ-ын сонгуулийн үеэр тэд тус улсын эрх баригч намыг эсэргүүцэх зорилгоор санал өгөх тактикийн аппликейшн ажиллуулжээ.
Навальный хүний эрхийн шагналыг хүлээн авснаар тус холбооны гишүүн 27 орон болон ОХУ-ын хоорондын хурцадмал байдлыг нэмэгдүүлэх бололтой.
ЕХ Навальныйг анх баривчлагдсанаас хойш суллахыг шаардаж байгаа бөгөөд түүнийг хорих ялыг улс төрийн зорилготой гэж үзэж байгаа юм.
Өнгөрсөн онд тус холбоо Оросын зургаан албан тушаалтанд Навальныйг хордуулах халдлагад оролцсон гэх үндэслэлээр хориг арга хэмжээ авсан юм.
Европын парламент 2020 оны Сахаровын шагналыг Беларусийн сөрөг хүчний удирдагч Святлана Циханоускаяд гардуулж байсан.
Чөлөөт Ардчилсан Намтай Бундестагийн гишүүн Рената Алт DW-д өгсөн ярилцлагадаа энэ мэдэгдэл нь түүнийг торны цаана мартагдахгүй байгаагийн чухал шинж тэмдэг гэж мэдэгджээ. Дараа нь тэрээр Германы канцлер Ангела Меркелийг шүүмжилсэн бөгөөд тэрээр Путины засгийн газрын эсрэг хангалттай арга хэмжээ авч байгаагүй гэж хэлжээ.
Эх сурвалж: dw.com
