/2023.03.14/: Малавигийн өмнөд хэсгийг Фредди хар салхи дайран өнгөрсний дараа даваа гарагт 99 хүн амиа алдсан болохыг тус улсын Гамшгийн удирдлагын асуудал эрхэлсэн комиссар Чарльз Калемба мэдэгдэв.

Калембагийн хэлснээр Малави улсын худалдааны нийслэл Блантайр хотод амиа алдагсдын ихэнх нь байсан аж.

"Гамшгийн улмаас нийт 99 хүн амиа алдсан гэж бүртгэгдсэн бөгөөд Блантайр хотод 85 хүн амиа алдаж 134 орчим хүн эмнэлэгт хүргэгдсэн" гэв. Мөн амиа алдсан болон шархадсан хүмүүсийн тоо нэмэгдэж болзошгүйг анхаарууллаа.

Үйл явдалтай холбоотойгоор Малави улсын засгийн газар тус улсын өмнөд бүс нутагт “гамшгийн байдал” зарлажээ.

Тус улсын Ерөнхийлөгч Лазарус Чаквера "Фредди хар салхи Малави улсын өмнөд бүс нутгийн ихэнх дүүрэгт сүйрлийг авчирч байгаад маш их санаа зовниж байна. Засгийн газар аль хэдийн хариу арга хэмжээ авч эхэлсэн бөгөөд гамшигт нэрвэгдсэн бүх дүүрэгт яаралтай тусламж үзүүлж, энэ гамшигт нэрвэгдсэн бүх гэр бүлд дотоодын болон олон улсын байгууллагуудыг дэмжлэг үзүүлэхийг уриалж байна" гэж мэдэгдлээ.

Үхлийн аюултай "Фредди" хар салхи энэ төрлийн хамгийн удаан үргэлжилсэн хар салхины дээд амжилтыг эвдэж, хөрш зэргэлдээ Мозамбик болон Мадагаскарыг дайрч, 20 гаруй хүний аминд хүрч, хоёр улс даяар олон мянган хүнийг нүүлгэн шилжүүлээд байна.

Эх сурвалж: CNN