/2023.01.09/ Эрүүгийн цагдаагийн газраас өнгөрсөн пүрэв гаригийн шөнө хойшлуулшгүй ажиллагаа явуулж, УБТЗ-ын нэр бүхий ажилтныг баривчилсан. Тодруулбал, Тээвэр зохион байгуулалтын албаны орлогч дарга С.Батдөлийн гэр болон түүний хамаарал бүхий этгээдүүдийн гэрээс 7,4 тэрбум төгрөгийг хураан авсан талаар ХЗДХ-ийн сайд Х.Нямбаатар мэдээлсэн юм.

Тэгвэл үүнтэй холбоотойгоор Нийслэлийн цагдаагийн удирдах газраас мэдээлэл хийлээ.

ЭЦА-ны эдийн засгийн гэмт хэрэгтэй тэмцэх газрын дарга, цагдаагийн дэд хурандаа н.Ганчулуун:

-Нэгжлэгээр 7,4 тэрбум төгрөгтэй тэнцэх хэмжээний дөрвөн төрлийн валют бэлнээр хураан авсан. Мөн 6 орон сууцны үл хөдлөх хөрөнгийн гэрчилгээ болон бусад шаардлагатай эд зүйлсийг хурааж авсан байгаа. Хэргийн холбогдогч Б-г Эрүүгийн хэрэг хянан шийдвэрлэх тухай хуулийн 18.6-д заасан Мөнгө угаах, 18.3 Татвар төлөхөөс зайлсхийх, 22.10 Үндэслэлгүйгээр хөрөнгөжих, 22.4 Хахууль авах гэсэн зүйл ангиудаар шалгаж байна.

Мөн өчигдөр буюу нэгдүгээр сарын 9-ний өдөр нэг сарын хугацаатай цагдан хорих, таслан сэргийлэх арга хэмжээ авсан. Цаашид хэргийг түргэн шуурхай шийдвэрлэхээр прокурорын хяналтын дор цагдаагийн байгууллага болон АТГ ажиллаж байна гэлээ.