/2022.12.19/: “Эрдэнэс Тавантолгой” ХК-иас цахим орчинд тархсан мэдээлэлтэй холбоотой мэдэгдэл гаргажээ.
Тус мэдэгдэлд,
"Цахим орчинд “Эрдэнэс Тавантолгой” ХК-ийн Засгийн газрын Онцгой бүрэн эрхт төлөөлөгч Ж.Ганбатыг тус компанийн ТУЗ-ийн гишүүнээр 8 жил ажиллаж байгаа тухай ташаа мэдээллийг түгээж байна.
“Эрдэнэс Тавантолгой” ХК-ийн Төлөөлөн удирдах зөвлөл нь төрийг төлөөлөх 7, хараат бус 4 гишүүний бүрэлдэхүүнтэй. Төлөөлөн удирдах зөвлөлийн гишүүдийг сонгохдоо Компанийн тухай хууль, “Эрдэнэс Монгол” ХХК-ийн дүрэм, “Эрдэнэс Тавантолгой“ ХК-ийн дүрэм болон бусад холбогдох хууль тогтоомжийг тус тус үндэслэн томилж чөлөөлдөг.
Засгийн газрын Онцгой бүрэн эрхт төлөөлөгч Ж.Ганбатын хувьд “Эрдэнэс Монгол”ХХК-ийн Гүйцэтгэх захирлын 2022 оны нэгдүгээр сарын 28-ны өдрийн А/09 тоот тушаалаар томилох шийдвэр гарсан бөгөөд “Эрдэнэс Тавантолгой” ХК-ийн Төлөөлөн удирдах зөвлөлийн 2022 оны дөрөвдүгээр сарын 22-ний өдрийн хурлаар баталгаажуулсан.
Иймд иргэд олон нийт та бүхэн цахим орчинд түгээж буй мэдээлэлд шүүлтүүртэй хандаж, эргэлзээтэй мэдээллийг www.ETT.mn цахим хаягаар нэвтэрч бодит мэдээлэлтэй танилцахыг хүсье" гэжээ.
Эх сурвалж: ЭТТ
