/2022.11.23/ Олон Улсын Эрчим хүчний Хартын 2022 оны Бага хурал энэ сарын 22-ны өдөр цахимаар болж, даргалагчаар Монгол Улс ажиллалаа.

Хурлыг Эрчим хүчний сайд Б.Чойжилсүрэн нээж, 45 улс орон, олон улсын байгууллагын нийт 150 гаруй төлөөлөгч нарт мэндчилгээ дэвшүүллээ. Тэрээр:

-Монгол Улс нь байгалийн баялаг ихтэй, эрчим хүчний экспортоор эдийн засгаа дэмжих боломж их. Мөн газарзүйн байршлын хувьд эрчим хүчний хэрэглээ өндөр орнуудын тогтвортой байдлыг сайжруулахад дэмжлэг болох боломжтой. Тус бүсийн орнууд харилцан бие биенээ нөхсөн хамтын ажиллагааг дэмжих замаар хил дамнасан цахилгаан дамжуулах шугам, дамжуулах хоолой, нүүрсний худалдаа зэрэг ашигт малтмал, дэд бүтцийн төслүүдийг хамтран хэрэгжүүлэх, харилцан ашигтай хамтран ажиллах боломжтой юм хэмээн онцлов.