/2022.11.17/ УИХ-ын чуулганы нэгдсэн хуралдаан болж байна. Хуралдаанаар Газрын ерөнхий хуулийн төсөл болон хамт өргөн мэдүүлсэн хуулийн төслийг хэлэлцэх эсэхийг хэлэлцлээ.

Энэ үеэр УИХ-ын гишүүн Г.Дамдинням:

-2016 онд Сэлэнгэ аймгийн Ерөө сум Дархан-Уул аймгийн 9,600 га газрын дээрэмдэж авсан. УИХ-ын тогтоолын нэрийг будлиулаад. Тухайн үед том даргатай аймаг, орон нутгууд нь бусдыгаа дээрэлхэж, дээрэмддэг байсан. Шинэ хуулиар энэ асуудал цэгцрэх үү.

Ажлын хэсэг:

-Хилийн цэгийг тогтоосон УИХ-аар батлагдсан тогтоолыг буруу ойлгосон байсан. Энэ асуудалд ажлын хэсэг байгуулан хоёр сумын удирдлагуудтай газар дээр нь ажиллаж шийдвэрлэсэн байгаа.

УИХ-ын гишүүн Г.Дамдинням:

-Та нар УИХ дээр орж ирж худлаа яриад байх юм. 1970 оноос хойш тухайн 9,600 га газар нутаг Дархан-Уул аймгийн газар нутаг байсан. 1992 оны Ардын их хурлын тогтоолын үеэр ч тус аймгийн газар нутагт харьяалагддаг байсан. Үүнээс хойш 24 жилийн дараа 2016 онд та нар дарга нарт үйлчлээд дээрэмдчихсэн. 50 жил Дархан-Уул аймгийн газар байсан талбайг буруу ойлгосон гэж хэлээд дээрэмдчихсэн байна. Хоёр сумын Засаг дарга хоорондоо ярилцаж шийдэгдсэн зүйл байхгүй гэлээ.