/2022.11.09/ "Жаст групп" ХХК-ийн захирал асан Ш.Батхүү нарт холбогдох шүүх хурал Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхэд болж, нэр бүхий таван иргэнийг гэм буруутайд тооцон шийдвэрлэжээ.
Тодруулбал "Жаст групп" ХХК-ийн захирал асан Ш.Батхүү Эрүүгийн хуулийн тусгай ангийн тодорхой заалтуудыг зөрчсөн учир түүний биечлэн эдлэх нийт хорих ялыг 10 жилийн хугацаагаар тогтоож, нээлттэй хорих байгууллагад эдлүүлэхээр болсон байна.
Мөн шүүгдэгч Ш.Батхүүгээс нийт 109 тэрбум төгрөгийг гаргуулж, Эрдэнэт Үйлдвэр ТӨҮГазар ХК-д 105 тэрбум төгрөгийг, “Шунхлай групп” ХХК-д 3.8 тэрбум төгрөгийг олгохоор тус тус шийдвэрлэсэн байна. Тэрбээр "битүүмжилсэн хөрөнгүүдээрээ хохирлоо барагдуулахад татгалзах зүйлгүй" хэмээн мэдүүлжээ.
