/2022.10.19/: Украин дахь Оросын армийн командлагч өмнөд хэсгийн Херсон хотод нөхцөл байдал хүнд байгаа тул оршин суугчдыг нүүлгэн шилжүүлэх шаардлагатай гэж мэдэгдэв.
Генерал Сергей Суровикин хэлэхдээ, "Украины цэргүүд Химарс пуужингаар тус хотын дэд бүтэц, орон сууц руу цохилт өгч байна" гэж Оросын төрийн телевизээр ярьжээ.
"Оросын арми юуны түрүүнд Херсоны хүн амыг аюулгүй нүүлгэн шилжүүлэх ажлыг хангах болно" гэж тэр хэлэв.
ОХУ-ын албан тушаалтан Кирилл Стремоусов Херсон хотын оршин суугчдад "ойрын ирээдүйд" Украины цэргүүд тус хот руу дайралт хийнэ гэж анхааруулжээ.
"Миний үгийг нухацтай хүлээн авна уу - би аль болох хурдан нүүлгэн шилжүүлэх тухай ярьж байна" гэж тэр Telegram-аар дамжуулан хэлэв. Тэрээр Днепр мөрний баруун эрэг (Украины Днепр гэж нэрлэдэг) орчмын хүмүүс эрсдэлд хамгийн их өртөж байгааг нэмж хэлэв.
Үүнийг ОХУ-аас томилогдсон тус мужийн захирагч Владимир Салдо видео мессежээр нотолсон байна.
Херсон бол хоёрдугаар сард оросуудын мэдэлд орсон анхны том хот юм.
Украины арми сүүлийн хэдэн долоо хоногийн турш ойр орчмын газар нутгаа тасралтгүй эргүүлэн авсаар байна. Тэд Днепр мөрний дагуу өмнө зүгт 30 км хол түрж, Оросын цэргүүдийг урхинд оруулахаар заналхийлэв.
"Цэргийн тусгай ажиллагааны бүсийн нөхцөл байдлыг бүхэлд нь хурцадмал байдалтай гэж хэлж болно" гэж генерал Суровикин хэлэв.
Херсон бол Оросуудын түрэмгийлэлд олзлогдсон Украины цорын ганц бүс нутгийн нийслэл юм. Кремль Херсон болон Украины өөр гурван бүс нутгийг Оросын нэг хэсэг гэж мэдэгдэж байгаа нь олон улсын хэмжээнд няцаагдаад байгаа юм.
Дэд бүтцийн гэмтэл
Харгис хэрцгий арга барилаараа алдартай генерал Суровикин хэлэхдээ, Украины харвасан пуужин Херсоны Антонивскийн гүүр болон Каховка усан цахилгаан станцыг сүйтгэж, гол артерийн дагуух хөдөлгөөнийг хаасан байна.
Энэ нь хүнсний хангамж, ус, цахилгаан зэрэг зайлшгүй шаардлагатай үйлчилгээний хангамжийн асуудал үүсгэсэн гэж тэр хэлэв.
Мөн Украинчууд зүүн талаараа Купянск, Лайман, өмнөд хэсэгт нь Николайв-Кривой Рогийн фронт руу өргөн фронтоор байнга довтолж байна гэж тэр хэлэв.
Херсоноос "нүүлгэн шилжүүлэх" ажлын цар хүрээ хараахан тодорхой болоогүй байна. Хэрэв Орос улс хүмүүсийг гэр орноо орхихыг албадвал энэ нь НҮБ-ын тодорхойлолтоор дайны гэмт хэрэг болох аж.
Гуравдугаар сард Украины тал ОХУ-ыг Мариуполь хотоос олон мянган хүнийг хууль бусаар нутаг дэвсгэртээ албадан гаргасан гэж мэдэгдсэн.
Дайны гэмт хэргийн тодорхойлолтод НҮБ-д дараахь зүйлс орно: "Эзлэгдсэн нутаг дэвсгэрт өөрийн энгийн хүн амын зарим хэсгийг эзлэн түрэмгийлэгч хүч шууд болон шууд бусаар шилжүүлэх, эсхүл эзлэгдсэн улсын хүн амыг бүхэлд нь буюу хэсэгчлэн албадан гаргах, шилжүүлэх"
Оросын Төрийн Дум-ын парламентын доод танхим мягмар гарагт Херсоны оршин суугчдыг Орос руу шилжүүлэх төлөвлөгөөг хэлэлцлээ. Шадар сайд Марат Хуснуллин ОХУ-ын хаана ч байсан тэдэнд шинэ байр санал болгож, засгийн газраас санхүүгийн тусламж үзүүлнэ гэж мэдэгдэв.
Дайны өмнөх Херсон хотын хүн ам бараг 300,000 хүн байсан ч Украины албаны хүмүүсийн тооцоолсноор тэдний тал орчим хувь нь хотыг орхин дүрвэсэн байна.
Генерал Суровикин бол Украин дахь Оросын дайны шинэ командлагч бөгөөд Кремлийн зүгээс үүнийг "цэргийн тусгай ажиллагаа" гэж нэрлэдэг.
Тэрээр генерал Армагеддон хочтой бөгөөд Оросын дайнд оролцсон ахмад дайчин юм. Сирид тэрээр Оросын бөмбөгдөлтийг удирдаж, олон энгийн иргэдийн амь насыг хохироосон юм. Тэрээр мөн Чеченьд хүний эрхийг зөрчсөн гэж буруутгагдаж буй цэргүүдийг командлаж байжээ.
Эх сурвалж: ВВС
