/2022.08.30/: Украины цэргүүдийн удаан хүлээсэн сөрөг довтолгоо өмнөд хэсгийн Херсон мужаас эхэлсэн байна.
Ерөнхийлөгч Володимир Зеленський “Хэрэв тэд амьд үлдэхийг хүсч байгаа бол зугтах цаг нь болсон” гэж Оросын армийнханд хэлсэн байна.
Украины цэргүүд Херсон хотын ойролцоох фронтын хэд хэдэн хэсэгт Оросын хамгаалалтыг эвдсэн гэж Зеленськийн ахлах зөвлөх мэдэгдэв.
Алексей Арестович ярилцлагадаа Украины цэргүүд Херсон муж дахь Оросын гатлага онгоцнуудыг буудаж байна гэж мэдэгджээ.
Зеленський даваа гарагийн орой үг хэлэхдээ сөрөг довтолгооны талаар онцолж хэлээгүй ч “Эзлэн түрэмгийлэгчид мэдэж байх ёстой. Бид тэднийг хил хүртэл хөөн гаргах болно. Хилийн шугам өөрчлөгдөөгүй” гэсэн юм.
Бууж өгсөн цэргүүдтэй Женевийн конвенцийн дагуу харьцах болно гэж тэр хэлээд "Хэрэв тэд намайг сонсохгүй бол Украины бүх газар нутгийг чөлөөлөх хүртэл бид зогсохгүй" гэж нэмж хэлэв.
"Украин улс өөрийн гэсэн бүхнээ буцаан авч байна. Үүнд Харьков, Луганск, Донецк, Запорожье, Херсон, Крым гээд бүгдийг буцааж авах болно" гэлээ.
Украины цэргүүд фронтын шугамыг гурван газар нэвтлэн Херсон хотын ойролцоох дөрвөн тосгоныг эргүүлэн авсан тухай CNN агентлаг Украины цэргийн эх сурвалжаас иш татан мэдээлсэн бөгөөд гол “бай” нь Херсон байв. Энэ ажиллагаа Оросын байрлал болон ар талыг хүчтэй цохиж, тэднийг зугтахад хүргэснээр эхэлсэн гэж эх сурвалж мэдээлэв.
Орон нутгийн орлогч бөгөөд Херсон мужийн амбан захирагчийн зөвлөх Сергий Хлан Украины "Прямый" телевизийн сувагт даваа гарагт "эзлэгдсэн Херсон мужийн нийт нутаг дэвсгэрт байгаа дайсны байрлал руу хүчтэй их буугаар довтолсон" гэж мэдэгджээ.
"Энэ бол бидний хавраас хойш хүлээж байсан Херсон мужийг эзлэн авах ажиллагааны төгсгөлийн эхлэл юм. Одоо болж байгаа зүйл бол сөрөг довтолгооны бэлтгэлтэй, тэнцвэртэй эхлэл юм" гэж Хлан Франс Пресс агентлагт ярьжээ.
Украины шинэ довтолгоо Николайв, Херсон мужид эхэлснийг Оросын Батлан хамгаалах яам хүлээн зөвшөөрсөн ч амжилтгүй болж, украинчууд ихээхэн хохирол амссан гэж РИА агентлаг мэдээлэв. "Дайсны довтлох оролдлого бүтэлгүйтсэн" гэж мэдэгджээ.
Эх сурвалж: Theguardian
