/2022.08.11/ УИХ-ын гишүүн Д.Ганбат, Ардчилсан намын ЕНБД Ч.Өнөрбаяр нар ОХУ, БНХАУ-ын Гадаад хэргийн сайд нарын айлчлал, Мөн НҮБ-ын ЕНБД-ын алчлалтай холбогдуулан АН-ын байр суурийг илэрхийллээ.

УИХ-ын гишүүн Д.Ганбат:

-Зургаадугаар сараас хойш Монгол Улс дэлхий нийтийн анхаарлын төвд байлаа. Японы гадаад хэргийн сайд, Хойд атлантын цэргийн эвслийн жанжин штабын дарга, ОХУ-ын гадаад хэргийн сайд, БНХАУ-ын гадаад хэргийн сайд Ван И болон НҮБ-ын ЕНБД нар айлчиллаа.

Маш чухал айлчлалууд боллоо. Ван И сайдаас бид маш их зүйл хүлээж байсан. Чамлахаар чанга атга гэгчээр Эрдэнэбүрэнгийн УЦС-ын асуудлыг түргэвчлэх, Гашуунсухайтын нүүрс тээврийг нэмэгдүүлэх гээд нэлээд чухал асуудлуудаар ярьлаа. Гэхдээ эрчим хүчний тав дахь эх үүсвэрийн асуудал ахиад тодорхойгүй хэвээр үлдэж байна.

Бид 10-аад жил эдийн засгийн хөгжил, дэвшил, ахицгүй жилүүдийг өнгөрөөсөн. Тиймээс АН-ын зүгээс том төслүүдийг яаралтай хөдөлгөж, ард түмний эрх ашигт нийцүүлж ажиллах ёстой гэж үзэж байна. Юмны үнэ нэмэгдэж, ард түмний амьдрал ахуй маш хүнд болсон байна гэлээ.