Он гарснаас хойш улсын хэмжээнд идэш тэжээлийн хомсдол болон зан төрхийн онцлогоос шалтгаалан хүрэн баавгай суурьшлын бүс рүү орж ирсэн 10 гаруй тохиолдол бүртгэгдээд байна.

Тухайлбал, нийслэлийн суурьшлын бүсэд баавгай орж ирсэн 3 удаагийн тохиолдол бүртгэгдсэн бол 8 сарын сүүлч болон 9 сарын эхээр Хэнтий, Дорнод зэрэг аймгуудад хүрэн баавгай уулнаас бууж ирэн айл болон малын бэлчээрт ойртсон тохиолдол бүртгэгджээ. Эдгээр дунд эх баавгай гурван бамбаруушийн хамтаар бууж ирсэн тохиолдол ч бий.

Тэгвэл баавгай ямар тохиолдолд уулнаас бууж ирдэг вэ?

Баавгай идэш тэжээлийн хомсдлоос үүдэн суурьшлын бүс рүү нэвтрэх тохиолдол бий. Самар, жимс, ургамал багатай, хуурайшилттай жилүүдэд баавгай өвөлжихөд шаардлагатай өөх тосоо хангалттай хэмжээнд авч чадахгүй нөхцөл байдалд хүрч, хоол тэжээл хайн уулнаас буудаг байна.

Мөн ойн түймэр, үер усны аюул болон эрс тэс цаг агаарын улмаас амьдрах орчин нь сүйрэх үед дүрвэн нүүдэллэхийн сацуу ойн баялаг буюу самар, жимс зэргийг зүй бусаар бэлтгэж, тэдний амьдардаг орчинд нэвтрэн чимээ шуугиан тарих нь тэднийг дайжихад хүргэдэг.

Үүний сацуу суурьшлын бүс дэх задгай хог хаягдал, малын сэг зэм болон хоолны үнэр зэрэг нь баавгайг уулнаас бууж ирэх бас нэгэн шалтгаан болдог аж. Мөн нас бие гүйцсэн догшин эр баавгайгаас бамбаруушаа хамгаалахын тулд эх баавгай уулнаас бууж, аюул багатай бүсэд ойртох тохиолдол ч бий.

Энэ жилийн хувьд самар, жимс ургац багатай жил тохиож байна. Байгаль орчны байгууллага болон тусгай хамгаалалттай газрын захиргаадын мэдээлснээр Богдхан уул болон бусад ойн бүсэд энэ жил самар, жимсний гарц эрс бага байгаа гэжээ.

Ийнхүү хүрэн баавгай хөвчийн уулнаасаа бууж ирэн аврал эрэх тохиолдол цаашид ч нэмэгдэж болзошгүй.

Иймээс иргэдийг самар, жимс түүхгүй байх, малын сэг зэм зэргийг ил задгай хаяхгүй байх, зүй бусаар хүнс бэлтгэж, тэдний амьдардаг орчинд нэвтрэн чимээ шуугиан тарихгүй байхыг анхааруулаад байна.

Ж.Сондор