\2024.09.20\
Цэргийн алба хаахаас зүрхшээдэг биш тэмүүлдэг болгох. Өөрөөр хэлбэл хүнээ бодсон, хүний эрхийг дээдэлсэн бодлого зорилтыг батлан хамгаалах салбарт хэрэгжүүлэхээр зорьж, салбарынхаа алба хаагчдын нийгмийн асуудлыг шийдвэрлэхээс ажлаа эхлүүлээд явж байна гэж Батлан хамгаалахын сайд С.Бямбацогт уулзалтын үеэр хэллээ. Тухайлбал онцгой нөхцөлийн нэмэгдлийг 25 хувь болгон нэмэгдүүлж, Монгол Улсын иргэн төрийн алба хаах адил тэгш боломжоор хангагдах нөхцөлийг бүрдүүлсэн.
Харин одоо хугацаат цэргийн алба хаагчдын сургалтын хөтөлбөрт өөрчлөлт оруулж, цэргийн алба хаах хугацаандаа жолооны үнэмлэхтэй, англи хэлний анхан шатны мэдлэгтэй болгох, цэргийн албаны нэр хүнд, амьдрах орчныг сайжруулах чиглэлээр анхааран ажиллаж байна гэв.
Дээрх асуудлаар Хүний эрхийн Үндэсний Комиссын дарга Д.Сүнжид, тус байгууллагын гишүүн Б.Энхболд болон албаны бусад төлөөлөгч нартай уулзаж санал солилцлоо. Хамтын ажиллагааны хүрээнд Хүний эрхийн зөрчлөөс урьдчилан сэргийлэх чиглэлээр 47 сургагч багш салбартаа бэлтгэн ажиллуулж байна. Ингэснээр салбарын бүх түвшинд хүний эрхийн ойлголт, мэдлэгтэй болно. Хүний эрх, эрүүл мэнд, амь насны асуудал, зөрчилд төр нь ч иргэн нь ч хяналтаа тавьдаг байх. Үр дүнд нь хүний эрхийн зөрчилгүй болно. Цаашлаад цэргийн насны залуучууд маань ч гэсэн эрүүл мэнддээ анхаардаг, үндсэн хуулиар хүлээсэн үүргээ хүн бүр ухамсарладаг болгоход Хүний эрхийн Үндэсний Комисстой хамтран ажиллахаар болжээ.
Эх сурвалж БХЯ
