/2024.07.05/

УИХ-ын 2024 оны сонгуулийн үр дүнд байгуулагдсан УИХ дахь МАН-ын бүлэг өнөөдөр /2024.07.05/ анхдугаар хуралдаанаа хийж, УИХ-ын дэд дарга, УИХ дахь МАН-ын Бүлгийн даргыг сонгох асуудлыг хэлэлцэн шийдвэрлэлээ.

УИХ-ын Дэд даргаар УИХ-ын гишүүн, Сангийн дэд сайд, ХНХ-ын сайд асан, МСДЭХ-ны тэргүүн Х.Булгантуяаг сонгохыг дэмжлээ. УИХ-ын дэд даргаар сонгогдсон Х.Булгантуяа нь англи, хятад, япон хэлтэй, эдийн засагч мэргэжилтэй. Дэлхийн банкны төслүүдэд төслийн Зөвлөх, төслийн удирдагч, Оюутолгой ХХК-д Төслийн Удирдагч, Бизнес хөгжлийн ахлах зөвлөхөөр ажиллаж байсан. НАМЗХ Удирдах зөвлөлийн гишүүн, МАН-ын Намын байгуулалт, хамтын ажиллагаа, төрийн бус байгууллага хариуцсан Нарийн бичгийн дарга, Монгол Улсын Сангийн Дэд сайд, Хөдөлмөр, Нийгмийн хамгааллын сайдаар ажилласан туршлагатай.

УИХ дахь МАН-ын бүлгийн даргаар УИХ-ын дэд дарга, Хууль зүйн байнгын хорооны дарга асан, УИХ-ын гишүүн, Хууль зүйн ухааны докторант, Л.Мөнхбаатарыг сонгохыг бүлгийн гишүүд 100 хувь дэмжлээ.

Бүлгийн даргаар сонгогдсон Л.Мөнхбаатарын хувьд 1999-2000 онд Хууль зүйн яамны Эрх зүйн шинэтгэл, стратегийн нэгдсэн төлөвлөлтийн газарт мэргэжилтэн, 2000-2006 онд Хууль зүй, дотоод хэргийн яамны Гэмт хэргээс урьдчилан сэргийлэх зөвлөлийн мэргэжилтэн, ахлах мэргэжилтэн, 2006-2008 онд Хууль зүй, дотоод хэргийн яамны Мэдээлэл, хяналт-шинжилгээ, үнэлгээний газрын дарга, 2008-2009 онд Засгийн газрын хэрэгжүүлэгч агентлаг, Иргэний бүртгэл, мэдээллийн улсын төвийн дарга, Улсын ерөнхий байцаагч, 2009- 2011 онд Засгийн газрын хэрэгжүүлэгч агентлаг, Улсын бүртгэлийн ерөнхий газрын дарга, Улсын ерөнхий байцаагч, 2012 онд Монгол Улсын Ерөнхий сайдын зөвлөх, 2013-2016 онд “Хөвсгөл хөгжил” сангийн тэргүүн, 2016 оноос Монгол Улсын Их Хурлын гишүүнээр 3 дахь удаагаа сонгогдон ажиллаж байна. 2022 онд Улсын Их Хурлын Хууль зүйн байнгын хорооны дарга, 2023 оноос Улсын Их Хурлын дэд даргаар ажилласан туршлагатай