/2024.05.07/: Ерөнхийлөгч Владимир Путин барууныхнаас үзүүлж буй “аюул заналхийлэлд” хариу арга хэмжээ авах цэргийн сургуулилтын хүрээнд Оросын хүчнийхэнд тактикийн цөмийн зэвсгийг байрлуулах сургуулилт хийхийг тушаажээ.

Путин 2022 онд Украинд цөмрөн орсноосоо хойш барууныхны эсрэг тактикийн цөмийн зэвсэг хэрэглэнэ гэж далд сүрдүүлгээ удаа дараа тавьж байсан ч даваа гарагт анх удаа сургуулилт зарлалаа.

"Сургуулийн үеэр стратегийн бус цөмийн зэвсгийг бэлтгэх, ашиглах асуудлыг дадлагажуулах цогц арга хэмжээ авна" гэж Оросын Батлан хамгаалах яам мэдэгдэв.

Стратегийн бус буюу “тактикийн” цөмийн зэвсгийг байлдааны талбарт ашиглаж болох ба стратегийн цөмийн зэвсгээс бага хүч чадалтай ч бүхэл бүтэн хотуудыг тэгшитгэх чадалтай аж.

Францын Ерөнхийлөгч Эммануэль Макрон өнгөрсөн долоо хоногт Орос улс Европын аюулгүй байдал болон хилийн ойролцоох бусад улс орнуудад эрсдэл учруулж байгааг анхааруулж, барууны цэргийг Украин руу илгээхийг үгүйсгэхгүй гэдгээ дахин нотолсон юм.

Макрон The Economist сэтгүүлд өгсөн ярилцлагадаа "Би юуг ч үгүйсгэхгүй, учир нь бид юуг ч үгүйсгэдэггүй хүнтэй тулгараад байна." "Надад тодорхой стратегийн зорилго бий: Орос Украинд ялалт байгуулж чадахгүй. Хэрэв Орос Украинд ялалт байгуулбал Европт аюулгүй байдал үгүй болно" гэсэн юм.

Мөн өнгөрсөн долоо хоногт Украинд айлчлах үеэрээ Их Британийн Гадаад хэргийн сайд Дэвид Кэмерон ОХУ-ын нутаг дэвсгэр дэх объектуудад цохилт өгөхдөө Украин Британиас нийлүүлсэн зэвсгийг ашиглаж болно гэж мэдэгджээ.

"Украинчууд эдгээр зэвсгийг хэрхэн ашиглах нь тэдний шийдвэр юм. Тэд эх орноо хамгаалж байна. Тэднийг Путин хууль бусаар эзлэн түрэмгийлсэн тул тэд ийм алхмуудыг хийх ёстой” гэж Кэмерон Их Британи Украинд санхүүгийн болон цэргийн дэмжлэг үзүүлэхээ амласны дараа сэтгүүлчдэд хэлжээ.

АНУ-ын тусламжийн дийлэнх хэсгийг Украинд хүргэхээс өмнө Москва өөрийн хүн хүч, сумны давуу талаа нөхөхийг хичээж байгаа тул Оросын арми өнгөрсөн сард Украины зүүн фронтын дагуух дор хаяж гурван байршилд ахисан ялалт байгуулжээ.

Эх сурвалж: CNN