/2022.06.03/: 100 хоног үргэлжилсэн дайны дараа Оросын арми Украины нутаг дэвсгэрийн 20 орчим хувийг хяналтандаа байлгаж байна гэж Украины Ерөнхийлөгч Володимир Зеленський мэдэгдлээ.
Оросын арми хэд хэдэн чиглэлээр урагшлахыг оролдож байгаа тул Украины цэргийнхэн Луганск, Донецк мужуудын хэд хэдэн хэсэгт хамгаалан тулалдаж байна.
Хотын гудамжуудад тулаан үргэлжилсээр байна: Луганск мужийн Северодонецк хотын эргэн тойронд Украины хүчин Оросын дайралтыг тэсвэрлэж байна гэж Зеленський пүрэв гарагт мэдэгдэв. Зеленський "Северодонецкийн тулалдаанд бид тодорхой амжилт гаргасан ч хэлэхэд эрт байна. Оросын цэргүүдийн хяналтад байдаг хотын гудамжинд тулаан үргэлжилсээр байна" гэв.
Олон зуун хүн нуугдаж байна: Оросын пуужингийн довтолгооны бай болсон Северодонецк дахь химийн үйлдвэрийн дор байрлах хэд хэдэн тэсрэх бөмбөгний хоргодох байранд хүүхдүүдийг оролцуулаад 800 орчим хүн нуугдаж байна гэж Луганск мужийн цэргийн захиргааны дарга мэдэгдэв.
Украины өмнөд хэсэг дахь амжилт: Украины цэргүүд эзлэгдсэн өмнөд хэсгийн Херсон мужид Оросын байрлалын эсрэг довтолгооны үеэр ихээхэн ахиц дэвшил гаргасан гэж мэдэгдэв. Зэвсэгт хүчин "эзлэгдсэн газар нутгаас" 8 км газрыг чөлөөлсөн гэж Нутаг дэвсгэрийн хамгаалалтын АЗОВ Днепр анги мэдээллээ.
АНУ-ын кибер ажиллагаа: АНУ-ын армийн хакерын нэгж болох Кибер командлал Украиныг дэмжих зорилгоор довтолгооны кибер ажиллагаа явууллаа гэж тус командлалын дарга мэдэгдэв.
НАТО-гийн тэргүүн Байдентай уулзлаа: НАТО-гийн Ерөнхий нарийн бичгийн дарга Йенс Столтенберг пүрэв гарагт АНУ-ын Ерөнхийлөгч Жо Байден, Дэд Ерөнхийлөгч Камала Харрис, Үндэсний аюулгүй байдлын зөвлөх Жейк Салливан нартай уулзалт хийсэн гэж мэдэгдэв. Столтенберг уулзалтын дараа сэтгүүлчдэд хэлэхдээ, "Ерөнхийлөгч Путин НАТО-ийн хамрах хүрээг багасгахыг хүсч байсан ч Украин руу довтолсноор улам том, нягт болж байна" гэж мэдэгджээ.
