/2022.04.19/ Монгол Улсаас ОХУ-д суугаа Онц бөгөөд Бүрэн эрхт Элчин сайд Ө.Энхтүвшин ОХУ-ын Гадаад хэргийн дэд сайд И.В.Моргуловтой Оросын Гадаад хэргийн яаманд өчигдөр уулзаж, цаг үеийн асуудлуудаар санал солилцжээ.

Уулзалтын эхэнд Элчин сайд Ө.Энхтүвшин Украины эргэн тойрон дахь үйл явцын талаар Монгол Улсын байр суурийг илэрхийлсэн байна.

Мөн монгол-оросын эдийн засаг, санхүүгийн хамтын ажиллагааны зарим тодорхой асуудал, тухайлбал үндэсний мөнгөн тэмдэгтийг төлбөр тооцоонд харилцан ашиглах тухай ярилцсан байна. Эдүгээ олон улсын нөхцөл байдал төвөгтэй байгаа хэдий ч Монгол Улсын Ерөнхийлөгчийн ОХУ-д хийсэн айлчлалын үед тохиролцсон томоохон асуудлууд, хамтын төсөл хөтөлбөрүүдийн хэрэгжилтийг цаг тухайд нь хангах шаардлагатайд талууд санал нэгджээ.