/2023.04.24/: Кенийн цагдаа нар нэгэн шашны удирдагчийг байцаах явцдаа далайн эргийн Малинди хотын ойролцоо 47 хүний цогцсыг олжээ.
Амиа алдсан хүмүүсийн дунд хүүхдүүдийн цогцос байжээ. Цагдаа нар булшнуудыг ухах ажиллагааг үргэлжлүүлсээр байгаа тул амиа алдагсдын тоо нэмэгдэж магадгүй аж.
Байцаагдаж буй номлогч болох шашны гаж урсгалын сүмийн удирдагч Пол Макензи Нтенге нь дагалдагчдаа өлсөж үхэхийг захиж байсан бөгөөд түүнийг хүмүүсийн амиа алдсан явдалд буруутай хэмээн хориод байгаа юм.
Булшны нэгэнд нэг гэр бүлийн таван гишүүн буюу гурван хүүхэд, тэдний эцэг эхийн цогцос олджээ.
Нтенге 2019 онд номлолоо зогсоож сүмээ хаасан хэмээн өөрийгөө хэрэгт холбоогүй гэсэн хэдий ч түүнийг батлан даалтад гаргахаас татгалзаад байна.
Тэрээр дагалдагчдадаа “Есүстэй уулзахын тулд өлсөж үхэх хэрэгтэй” гэж номлож байсан байж магадгүй гэж цагдаа нар үзэж байна.
Кенийн өдөр тутмын "Стандарт" сонинд эмгэг судлаачид амиа алдагсдаас ДНХ-ийн дээж авч, өлсгөлөнгөөс болж үхсэн эсэхийг тогтоох шинжилгээ хийнэ гэж мэдэгджээ.
Эх сурвалж: ВВС
