Австрийн аж ахуйн нэгжийн төлөөлөл манай улсад ирж ажиллана
 
Энэ мэдээ хуучирсан буюу 2023/03/23-нд нийтлэгдсэн мэдээ болно.

Австрийн аж ахуйн нэгжийн төлөөлөл манай улсад ирж ажиллана

/2023.03.23/: Эдийн засгийн хамтын ажиллагааны Монгол, Австрийн Засгийн газар хоорондын комиссын 8 дугаар хуралдаан 2023 оны гуравдугаар сарын 21-ний өдөр Вена хотноо боллоо.

Хуралдааныг монголын талаас Цахим хөгжил, харилцаа холбооны сайд Н.Учрал, австрийн талаас Хөдөлмөр, эдийн засгийн яамны Олон улсын эдийн засгийн харилцааны газрын Ерөнхий захирал Франц Вессиг нар хамтран удирдаж явуулав.

ЗГХК-ын хуралдаанаар цахим хөгжил, уул уурхай, санхүү, хөдөө аж ахуй, аялал жуулчлал, байгаль орчин, авто тээвэр болон барилга хот байгуулалтын салбарт хамтран ажиллах талаар дэлгэрэнгүй хэлэлцэв.

Тухайлбал, “Шинэ Зуун мод” төсөл, гэр хорооллын бүсэд өндөр хурдны интернет нэвтрүүлэх төслийг монголын тал танилцуулж, санал солилцов.

Түүнчлэн мэдээлэл, харилцаа холбооны технологийн шийдлийг төрийн үйлчилгээнд нэвтрүүлж, цахим засаглалыг хөгжүүлэхэд харилцан туршлага солилцох өргөн боломж байгааг нотолж, холбогдох байгууллагууд хоорондын шууд харилцааг хөгжүүлэхэд анхаарч ажиллахаар тохиров.

Мөн оюутан солилцоо, иргэд хоорондын харилцаа, боловсрол, соёл, спортын салбарт хэрэгжүүлэх санаачилгын талаар хэлэлцэж, уул уурхай, авто тээвэр, нийгмийн хамгааллын салбарын хэлэлцээр, яриа хэлцлийг урагшлуулахаа талууд нотоллоо.

Хуралдааны үеэр “Монгол-Австрийн бизнес форум”-ыг зохион байгуулсан ба монголын 10 гаруй, австрийн 40 компанийн төлөөлөл оролцож, хоёр талын хувийн хэвшлээс дэвшүүлсэн тодорхой төсөл, санаачилгыг ЗГХК-ын хуралдаанаар мөн хэлэлцэв.

Хоёр улсын Засгийн газар хоорондын Санхүүгийн хамтын ажиллагааны хэлэлцээрийн хүрээнд эрүүл мэнд, хүний хөгжил, дэд бүтцийн салбарт олон төсөл амжилттай хэрэгжиж буйг талууд онцолж, Хавдрын урьдчилан сэргийлэлт, эрт илрүүлгийн үндэсний сүлжээ байгуулах төсөл, АШУҮИС болон эмнэлгүүдийн тоног төхөөрөмжийг шинэчлэх төслийн гэрээг ойрын хугацаанд байгуулахаар тохиролцов.

Энэ оны долоодугаар сард Монгол, Австри Улс хооронд дипломат харилцаа тогтоосны 60 жилийн ой тохиох бөгөөд энэ хүрээнд Австрийн аж ахуйн нэгжийн төлөөлөл энэ оны есдүгээр сард Монгол Улсад ирж ажиллахаар боллоо.

Эх сурвалж: ГХЯ

Г.Дамдинням: Шалгуурыг нь хангаж сургалтын зээл авсан, одоо ямар ч өргүй
Г.Дамдинням: Шалгуурыг нь хангаж сургалтын зээл авсан, одоо ямар ч өргүй
 
Төрийн өмчийн бүх музейг хүүхдүүд хэдийд ч үнэгүй үзэх боломжтой
Төрийн өмчийн бүх музейг хүүхдүүд хэдийд ч үнэгүй үзэх боломжтой
Энэ мэдээ хуучирсан буюу 2023/03/23-нд нийтлэгдсэн мэдээ болно.