/2023.02.20/: БНАСАУ Солонгосын хойгийн зүүн эргийн ус руу хэд хэдэн үл мэдэгдэх баллистик пуужин харвасан гэж албаныхан мэдэгдлээ.
Японы эргийн хамгаалалтын алба өөрийн албан ёсны цахим хуудсандаа, Хойд Солонгос гурван сэжигтэй баллистик пуужин харвасан гэж мэдэгдсэн бол Өмнөд Солонгосын нэгдсэн штабын дарга нар зөвхөн хоёр богино тусгалтай баллистик пуужин илрүүлсэн гэж мэдэгджээ. Умард Солонгосын Өмнөд Пёнган мужийн Сукчон орчмоос орон нутгийн цагаар даваа гарагийн өглөөний 07:00-07:11 цагийн хооронд пуужин харвасан гэж Өмнөд Солонгосын тал мэдэгдэв.
Японы эргийн хамгаалалтын алба орон нутгийн цагаар даваа гарагийн өглөө хөлөг онгоцнуудад анхааруулга өгч, "анхааралтай байхыг" зөвлөжээ. Мөн тус агентлаг хөлөг онгоцнуудад унасан пуужингаасс хол байж, харсан зүйлээ эргийн хамгаалалтад мэдэгдэхийг сануулсан байна.
БНАСАУ-ын удирдагч Ким Чен Уны эгч, тус улсын дээд албан тушаалтнуудын нэг Ким Ё Жон даваа гарагт пуужин харвах үед мэдэгдэл хийжээ.
Тэрээр Солонгосын төв мэдээллийн агентлаг (KCNA)-д хийсэн мэдэгдэлдээ, "Умард Солонгос пуужин хийх хангалттай технологи, чадавхитай. Бусдын технологид эргэлзэж, санаа зовохын оронд өөрсдийгөө хамгаалах арга хэмжээний талаар илүү гүнзгий бодож үзсэн нь дээр" гэж хэлжээ.
Тэрээр хэрэв Хойд Солонгос АНУ-ын зэвсэгт хүчнийг аюул заналхийлэл гэж үзвэл холбогдох арга хэмжээ авах болно гэж хэлээд "Номхон далайг буудлагын талбайгаа болгон ашиглах давтамж нь АНУ-аас шалтгаална" гэв.
Энэхүү үл мэдэгдэх пуужинг харвахаас нэг өдрийн өмнө Хойд Солонгос өнгөрсөн бямба гарагт тив алгасах баллистик пуужин (ICBM) туршсан гэдгээ хүлээн зөвшөөрсөн бөгөөд энэ нь сүүлийн нэг жил хүрэхгүй хугацаанд алсын тусгалын зэвсгийн гурав дахь удаагаа туршсан тохиолдол юм.
Солонгосын төрийн мэдлийн агентлагийн мэдээлснээр удирдагч Ким Чен Уны бичгээр өгсөн тушаалын дагуу Хвасон-15 ICBM-ийг харвасан байна.
KCNA-гийн тайланд дурдсанаар пуужин 5768.5 км замыг 989 км-ийн өндөрт бараг 67 минут нисчээ.
Энэ туршилт нь Пхеньяны “дайсагнагч хүчний эсрэг цөмийн сөрөг довтолгоо” хийх чадамжийн нотолгоо бөгөөд “бидний хүчирхэг байдлын тод нотолгоо” гэж мэдэгджээ.
Хэрэв АНУ болон Өмнөд Солонгос цэргийн сургуулилт хийхээр төлөвлөж байгаа бол урьд өмнө хэзээ ч байгаагүй хүчтэй хариу арга хэмжээ авна гэж Умард Солонгос баасан гаригт анхааруулсны дараа энэхүү туршилт боллоо.
Вашингтон, Сөүл ирэх сард Солонгосын хойгт цэргийн сургуулилт хийх төлөвтэй байна.
Эх сурвалж: CNN
